Трамп: Польш дахь АНУ-ын цэргийн бааз байгуулахад томоохон ахиц гарлаа

АНУ-ын ерөнхийлөгч Дональд Трамп Пүрэв гарагт Польш улсын нутаг дэвсгэрт АНУ-ын цэргийн бааз байгуулах ажилд «том дэвшил» гарсныг сошиал хуудсаараа зарлажээ.

«Миний найз, Польшийн ерөнхийлөгч Карол Навроцкийн зоригтой манлайллын ачаар Польш улсад АНУ-ын цэргийн бааз байгуулах чиглэлд томоохон ахиц дэвшил гарч байна» гэж тэр бичжээ. Трамп мөн «Хэрвээ энэ ажил хэрэгжвэл байршлыг тун удахгүй зарлах болно. Энэ нь АНУ болон Польшийн холбоотны аугаа харилцааны түүхэн алхам байх болно» гэж нэмсэн байна.

Энэ мэдэгдэл Европ дахь цэргийн оролцоогоо АНУ багасгаж болзошгүй гэсэн болгоомжлол холбоотнуудын дунд үүссэн үед гарч байна. НАТО-гийн зүүн жигүүрт Украин, Орос улсуудтай хиллэдэг, үндэсний дотоодын нийт бүтээгдэхүүнийхээ 5 орчим хувийг батлан хамгаалах салбарт зарцуулдаг Польш улс өөрийн нутаг дэвсгэр дээр АНУ-ын цэргийн оролцоог бэхжүүлэхийн төлөө идэвхтэй ажиллаж байгаа.

Өнгөрсөн сард Польшийн батлан хамгаалахын дэд сайд Павел Залевски тус улс өөрийн нутаг дэвсгэрт АНУ-ын цэргийн бааз байгуулах асуудлаар Вашингтонтой хэлэлцэж байгааг мэдээлсэн юм. «Бид үйл явцын эхний шатыг аль хэдийн дуусгасан бөгөөд улс төрийн хүсэл сонирхлоо ч үүнээс өмнө илэрхийлсэн» гэж Залевски TVP сувгаар ярьж байв.

Одоогоор Европын Холбооны гишүүн Польш улсад АНУ-ын 10,000 орчим цэрэг байрладаг. Польшийн ерөнхийлөгч Навроцки консерватив үзэл баримтлалаараа Трамптай ойр холбоотон бөгөөд өнгөрсөн онд Цагаан ордонд айлчилж, Трамп илүү олон цэрэг илгээх саналыг түүнд тавьж байжээ.

Харин Трампын Европын бусад холбоотнуудтай харилцах харилцаа нэлээд муу байгаа. Ираны дайнд нутаг дэвсгэр дээрх баазуудаа ашиглуулахаас Европын орнууд татгалзсан нь Трампыг бухимдуулсан. Пентагоны тэргүүн Пит Хэгсэт өнгөрсөн онд Гааг хотод болсон НАТО-гийн чуулганы үеэр батлан хамгаалах нэгдсэн төсөвт оруулах хувь хэмжээгээ биелүүлээгүй орнуудаас цэргээ татахаар сүрдүүлж байв. Тус чуулганаар НАТО-гийн гишүүн орнууд 2035 он гэхэд батлан хамгаалах зардлаа дотоодын нийт бүтээгдэхүүнийхээ 5 хувьд хүргэхээр тохиролцсон юм.