Трамп Ормузын хоолойг нээх Ираны саналыг хүлээж авахгүй гэв

Ираны эрх баригчид тодорхой нөхцөл хангагдвал Ормузын хоолойг долоо хоногийн дотор нээхэд бэлэн гэдгээ илэрхийлж, саналаа АНУ-д хүргүүлснийг Баасан гарагт зарласан. Харин АНУ-ын ерөнхийлөгч Дональд Трамп уг саналыг хүлээж авахгүй гэдгээ Бямба гарагт мэдэгдсэн байна.

АНУ-ын өдөөсөн, долоон сар үргэлжилж буй Ираны эсрэг дайны гол цэг нь дэлхийн эрчим хүчний тээвэрлэлтийн чухал усан зам болох Ормузын хоолой болжээ. Дайн хэзээ дуусах нь тодорхойгүй байна.

„Би тэдний саналыг хүлээж авахгүй. Тэд одоо маш хүнд байдалд байгаа учраас Ормузын хоолойг нэн даруй нээх яриа хэлэлцээг хүсэж байна. Тэд тохиролцохыг хүсэж байгаа нь сайн хэрэг гэж би бодож байна. Би ч бас тохиролцох дуртай“ гэж Трамп сэтгүүлчидтэй уулзахдаа хэлсэн.

НҮБ-ын ерөнхий ассамблейн чуулганаас буцах замдаа Ираны ерөнхийлөгч Масуд Пезешкиан CBS News сувагт уг саналыг дээд удирдагч Можтаба Хаменитай зөвлөлдөж боловсруулсан талаар ярьсан.

Ираны гадаад хэргийн сайд Аббас Арагчи өмнө нь тавьсан шаардлагын дунд Ойрх Дорнодод, тэр дундаа Ливанд болж буй бүх байлдааны ажиллагааг зогсоох, Ираны битүүмжлэгдсэн хөрөнгийг чөлөөлөх, газрын тосны хоригийг цуцлах, АНУ-ын тэнгисийн бүслэлтийг зогсоох зэрэг нөхцөл байгааг мэдээлж байв. Тэрбээр энэ долоо хоногийн эхээр Трампын тусгай элч Стив Виткоффтой уулзжээ.

Вашингтон, Техраны эрх баригчид зургаадугаар сард дайныг зогсоож, Ормузын хоолойг нээж, цөмийн хөтөлбөртэй холбоотой яриа хэлэлцээг сэргээх зорилготой харилцан ойлголцлын санамж бичиг байгуулж байсан. Гэвч удалгүй Ираны тал батлагдсан маршрутаас хазайсан үндэслэлээр Ормузын хоолойгоор дамжин өнгөрсөн арилжааны хөлгүүд рүү довтолсноор энэхүү тохиролцоо нуран унасан.