Трамп Канадын Bombardier компанийг АНУ-д борлуулалтыг зогсооно хэмээн сүрдүүлжээ

АНУ-ын Ерөнхийлөгч Дональд Трамп Канадын нисэх онгоц үйлдвэрлэгч Bombardier компанийг АНУ-д үйлдвэрлэлээ явуулахгүй бол худалдааг нь зогсоохоор сүрдүүлжээ. Тэрбээр хоёр улсын худалдааг “шударга бус” гэж шүүмжилсэн байна.

Сошиал хуудсандаа ууртай мэдэгдэл нийтэлсэн нь энэ онд тус компанийг хоёр дахь удаагаа сүрдүүлсэн явдал болж байна. “АНУ-д Bombardier зарагдахгүй” гэж тэр том үсгээр бичсэн ч энэ зорилтоо хэрхэн хэрэгжүүлэх талаар дурдаагүй ажээ.

Трамп цааш нь “Хэрвээ тэд манай зах зээлийг хүсэж байгаа бол энд үйлдвэрлэж, Америкийг мөнгөний гахай шиг ашиглахаа зогсоох хэрэгтэй. Манай Америкийн аугаа банкнууд, компаниудын үйл ажиллагааг Канадад хориглож байна. Энэ эрин үе ДУУСЛАА” гэж мэдэгдсэн байна. Түүний хэлснээр Bombardier компанийн нийт орлогын талаас илүү хувийг АНУ-ын зах зээл бүрдүүлдэг.

Энэ оны нэгдүгээр сард Канад улс АНУ-д үйлдвэрлэсэн Gulfstream онгоцны шинэ загваруудын зөвшөөрлийн гэрчилгээ олгохоос татгалзахад Трамп Bombardier-ийн онгоцнуудын гэрчилгээг цуцалж, 50 хувийн импортын татвар ногдуулахаар сүрдүүлж байв. Гэвч дараа сард Канадын тал гэрчилгээ олгосноор сүрдүүлэг хэрэгжээгүй юм.

Өнгөрсөн сард хоёр улсын худалдааны яриа хэлэлцээ бүтэлгүйтсэнээр худалдааны дайн эхэлсэн. Трамп Канадын 20 тэрбум ам.долларын бараанд 50 хувийн татвар ногдуулсны хариуд Канад улс өчигдөр буюу Мягмар гарагаас эхлэн АНУ-ын ган, хөнгөн цагаан, сүү, сүүн бүтээгдэхүүн зэрэгт 15, 25, 50 хувийн татвар нэмэгдүүлсэн байна.