Трамп Иран Лос-Анжелес, Сан-Диегог устгаж болзошгүй гэж мэдэгдэв

АНУ-ын ерөнхийлөгч Дональд Трамп Небраска мужийн Гранд-Айленд хотод болсон улс төрийн цуглааны үеэр Иран улс Лос-Анжелес, Сан-Диего зэрэг АНУ-ын томоохон хотуудыг "устгах" боломжтой гэж мэдэгдсэн нь Калифорни мужийн Ардчилсан намын удирдлагууд болон Бүгд Найрамдах намын зарим гишүүдийн шүүмжлэлд өртжээ.

"Тэд бүхэл бүтэн хотыг устгаж ч болохоор байлаа. Лос-Анжелесыг устгаг л дээ, Сан-Диегог ч юм уу. Энэ бол маш бага золиос бөгөөд удахгүй дуусах болно. Үнэн хэрэгтээ энэ бараг л дуусчихсан. Маш удахгүй, ямар нэгэн байдлаар эцэслэх болно"

Трамп дайны үеийн эдийн засгийн хүндрэл, золиослолын талаар ярихдаа үнийн өсөлтийг "төлөхөд тийм ч их мөнгө биш" гэж үзэж, "Дэлхий ертөнц болон улс орноо аюулгүй байлгахын тулд төлж буй багахан үнэ" гэж хэлсэн байна.

Мягмар гарагт Цагаан ордон эдгээр мэдэгдэлтэй холбоотой шүүмжлэлийг няцаасан байна. Цагаан ордны харилцаа холбооны албаны дарга Стивен Чун сошиал сүлжээгээр "Цөмийн зэвсэгтэй Ираныг зогсоогоогүй байсан бол АНУ-ын хотууд аюулд орох байсан гэдгийг л тэр тодорхой хэлсэн хэрэг" гэж мэдэгджээ.

Калифорни мужийн захирагч Гэвин Ньюсом Трампыг "ухаан санаа нь эрүүл бус, аюултай хүн" гэж шүүмжилсэн бол Сан-Диегогийн тойрогт сонгуульд өрсөлдөж буй Бүгд Найрамдах намын гишүүн Жим Десмонд "Би ерөнхийлөгч Трампын хэлсэн үгтэй огтхон ч санал нийлэхгүй байна" гэж мэдэгдсэн байна.

Сан-Диего хотыг АНУ-ын Конгресст төлөөлдөг Ардчилсан намын гишүүн Сара Жэкобс "Миний тойргийн иргэд, тэр дундаа цэргийн алба хаагчид, ахмад дайчид болон тэдний гэр бүлийнхэн Трампын тэнэг дайны улмаас гарч буй 'хохирол' байх ёсгүй" гэжээ.

Лос-Анжелес, Сан-Диего нь хүн амын тоогоороо Калифорни мужийн хамгийн том болон хоёр дахь том хотод тооцогддог бөгөөд Сан-Диего хотод АНУ-ын баруун эргийн хамгийн том цэргийн бааз оршиж, 115,000 гаруй алба хаагч байрладаг.