Төв цэнгэлдэх хүрээлэнд 21 аймгийн үйлдвэрлэгчид бүтээгдэхүүнээ борлуулж байна

Төв цэнгэлдэх хүрээлэнд «Намрын ногоон өдрүүд-Үндэсний үйлдвэрлэл 2026» өргөтгөсөн худалдаа нээгдээд байна. Арга хэмжээ энэ сарын 27-ны өдрийг дуустал үргэлжилнэ.

21 дэх жилдээ зохион байгуулж буй энэхүү худалдаанд 21 аймгийн үндэсний үйлдвэрлэл, газар тариалан, мал аж ахуй, хөнгөн үйлдвэрийн салбарын үйлдвэрлэгчид, жижиг, дунд үйлдвэрлэл эрхлэгчид шинэлэг, олон нэр төрлийн бүтээгдэхүүнээрээ оролцож байна.

Тус арга хэмжээ нь бүтэн жилийн хөдөлмөрийн үр шим, шинэ ургацын дээжээ нийслэлчүүдэд хүргэдэг тариаланч, үйлдвэрлэгчдийг хэрэглэгчидтэй шууд холбодог.

Нийслэлийн хүнсний хангамж гадаад зах зээл, хил боомт, тээвэр логистикийн нөхцөлөөс хамааралтай бөгөөд нийслэлчүүдийн хэрэглэж буй хүнсний ногооны 43 хувь, жимс жимсгэнийн 97 хувь нь импортын бүтээгдэхүүн байна.

Улаанбаатар хотын хүнсний ногооны хэрэгцээг 100 хувь дотоодоосоо хангах тогтолцоог бүрдүүлэх стратегийн зорилтын хүрээнд «Агро-сити» эдийн засгийн тусгай бүсэд дөрвөн улирлын хүлэмж, төрөлжсөн агуулах, боловсруулах үйлдвэр, тээвэр логистик, инновацын төвийг нэг дор цогцлоохоор төлөвлөжээ.

Мөн нийслэлийн есөн дүүргийн 18 байршилд нийт 152 цэгээр үзэсгэлэн худалдаа зохион байгуулж байна.