Томуу төст өвчтэй 6 хүртэлх насны хүүхдийн асран хамгаалагчид цалинтай чөлөө олгоно

Томуу, томуу төст өвчнөөр өвчилсөн зургаа хүртэлх насны хүүхдээ асарч байгаа эцэг, эх, асран хамгаалагчид 2026 оны арваннэгдүгээр сарын 1-нээс 2027 оны гуравдугаар сарын 1-ний өдөр хүртэл түр хугацааны зохицуулалт хэрэгжинэ. Эрүүл мэндийн сайд Э.Батшугар Засгийн газрын ээлжит хуралдааны шийдвэрийг танилцуулах үеэр энэ тухай мэдэгдлээ.

Тэрээр "Боломжтой тохиолдолд гэрээс цахимаар ажиллуулах; Цахимаар ажиллах боломжгүй бол ажлын тав хүртэлх хоногийн цалинтай чөлөө олгох түр хугацааны зохицуулалтыг хэрэгжүүлнэ" гэж хэлсэн.

Эдгээр нь төрийн албан хаагчдад хамаарах бөгөөд бусад хувийн хэвшлийнхэнд ч уриалж байгааг сайд нэмж хэлэв.

Сайд "Дэлхий даяар томуугийн рино вирусийн дэгдэлт маш өндөр байна. Манайд ч ялгаагүй энэ төрлийн вирус дэгдэлттэй байгаа" гэж хэлсэн. ЭМЯ-наас наймдугаар сард төлөвлөгөө баталж, томуу оношилдог лабораторийн шинжилгээний нөөцийг дөрвөн сараар нөөцөлсөн. Томуу есдүгээр сараас гуравдугаар сар хүртэл хамгийн дэгдэлттэй байдаг гэж тэрээр тайлбарлав.

Энэ жил эмнэлгийн нийт 4,000 орыг бэлдсэн. Үүний 2,400 нь Улаанбаатар хотод, 1,600 нь орон нутагт байна.

Өнгөрсөн жил Монгол Улс томуугийн эсрэг 300 мянган вакцин оруулж ирсэн бол энэ жил 500 мянган вакцин оруулж иржээ. Эхний ээлжийн 330 мянган вакцинаар дархлаажуулж дууссан. Есдүгээр сарын 30-нд 170 мянган вакцин орж ирсэн бөгөөд тэдгээрийг тараасан.

Сайд "Зорилтот бүлгийн хүмүүс вакцинаа хийлгээрэй гэж уриалж байна. Вакцин бол дэлхийн шинжлэх ухаанаар батлагдаж нотлогдсон хамгийн сайн арга хэмжээ. Томуугийн вакцин тариулсан хүн хүндэрч эмнэлэгт хэвтэх нь 60-70 хувь багасдаг олон улсын статистик бий" гэлээ.