The MongolZ баг Ташкентэд PUBG Mobile-ийн EECA тэмцээнд түрүүлж, 16 мянган ам.доллар хүртлээ

PUBG Mobile тоглоомын Зүүн Европ болон Төв Азийн аварга шалгаруулах "Global Open 2026 Season 2-EECA" тэмцээн Узбекистаны Ташкент хотноо есөн өдөр үргэлжилж, өчигдөр аваргаа тодрууллаа.

Нийт 80,000 ам.долларын шагналын сантай энэ тэмцээнд Европын 12 баг, Төв Азийн найман баг оролцсоны дотор Монголоос Aurora Gaming, The MongolZ, Team MIO гэсэн гурван баг өрсөлдлөө.

Сүүлийн шатны 17 тоглолтын нийлбэр дүнгээр The MongolZ баг 151 оноотойгоор нэгдүгээр байр эзэлж, 16 мянган ам.долларын шагнал хүртлээ. Мөн тэмцээний шилдэг тоглогчоор JIROv2 буюу Д.Уртнасан тодорч, 500 ам.долларын шагнал авлаа.

Ингэснээр The MongolZ баг энэ оны аравдугаар сард Пакистанд зохион байгуулагдах "PUBG Mobile Global Open 2026 Season 2" тэмцээнд оролцох эрхтэй боллоо. Харин Aurora Gaming баг 116 оноотойгоор долоодугаар байрт шалгарч гурван мянган ам.доллар, Team MIO баг 82 оноотойгоор 13 дугаар байр эзэлж хоёр мянган ам.долларын шагнал тус тус авлаа.

Өнгөрсөн жил Казахстанд зохион байгуулагдсан Global Open 2026 Season 1-EECA Finals тэмцээнд манай улсын "Aurora Gaming" баг 145 оноотойгоор нэгдүгээр байр эзэлж, 17 мянган ам.долларын шагнал авч байлаа.