Тамхины хяналтын хуульд 13 жилийн дараа өөрчлөлт орж, вэйп янжууртай ижил зохицуулалтад орлоо

Улсын Их Хурал Тамхины хяналтын тухай хуульд нэмэлт өөрчлөлт оруулах тухай хуулийн төслийг өнөөдөр эцэслэн баталлаа. Төслийг УИХ-ын 78 гишүүн өргөн барьсан.

Хууль 2027 оны нэгдүгээр сарын 1-нээс хэрэгжиж эхэлнэ.

Хууль санаачлагч, УИХ-ын гишүүн О.Номинчимэг энэ хуулийг 126 гишүүнтэй парламентад олон талаас нь ширүүн мэтгэлцээний дараа хэлэлцсэнийг онцлоод, «УИХ багийн шийдвэр гаргадаг. Энэ шийдвэрээрээ бид 13 жил шинэчлэгдэж чадахгүй байсан тамхины хяналтын тухай хуульд ахиц гаргаж, ирээдүй хойч үеийнхээ эрүүл мэндийг хамгаалах алхмыг хийсэндээ баяртай байна» гэв.

«Хууль 2027 оны нэгдүгээр сарын 1-нээс хэрэгжиж эхэлнэ. Энэ хууль үр дүнгээ өгч, хэрэгжилт нь сайн байж, 2030-2031 онд тамхидалтыг 13 хувиар бууруулах зорилтоо биелүүлэхийн төлөө хэрэгжилтэд нь анхаарч ажиллана» гэж тэр нэмж хэлсэн.

УИХ-ын гишүүн А.Ариунзаяа янжуур болон цахилгаан тамхи буюу вэйп нь адилхан хортой тул адил татвар авч, адилхан зохицуулалтад орохыг мэдэгдэв. Түүний хэлснээр аль ч төрлийн тамхинд жимсний амт, гаа, үнэр хориглогдож, 2027 оны нэгдүгээр сарын 1-нээс амттай, үнэртэй, жимсний амттай аливаа тамхийг Монгол Улсад хэрэглэх боломжгүй болно.

«Харин хамрын тамхи буюу уламжлалт монгол тамхинд ямар ч нөлөөлөл байхгүй. Ямар нэг хориг саад байхгүйг онцлон хэлье» гэлээ.

УИХ-ын гишүүн Б.Мөнхсоёл төслийг санаачилснаас хойш хоёр жилийн дараа батлагдсанд талархал илэрхийлээд, ажлын хэсгийг О.Номинчимэг ахалж, олон улсын байгууллагуудтай хамтран олон удаагийн уулзалт, хэлэлцүүлэг хийснийг дурдав.

«Хамгийн чухал үр дүн бол өсвөр насныхан хойч үеийнхээ эрүүл мэндийн асуудалд анхаарч, хорт зуршлаас урьдчилан сэргийлж чадах болсондоо баяртай байна» хэмээв.