Тамхины бүтээгдэхүүний импорт есөн сард 81.9 сая ам.долларт хүрч, халаадаг тамхи 177 дахин өсжээ

Гаалийн Ерөнхий Газар (ГЕГ)-ын статистик мэдээллээр 2026 оны эхний есөн сард улс руу 2.9 тэрбум ширхэг янжуур, 5.49 сая ширхэг электрон тамхи, 9.8 сая ширхэг халаадаг тамхи импортлогдсон байна.

Эдгээр бүтээгдэхүүнийг импортлоход зарцуулсан нийт мөнгөн дүн 81.9 сая ам.доллар буюу 295 орчим тэрбум төгрөгт хүрчээ. Энэ нь өмнөх оны мөн үеэс 16.44 сая ам.доллараар, 2024 оны мөн үеэс 19 хувиар нэмэгдсэн үзүүлэлт юм.

Төрөл тус бүрийн өсөлт

• Янжуур тамхи: 2.9 тэрбум ширхэг. Өмнөх оны мөн үеэс 69 сая ширхэг буюу 2.4 хувиар, хоёр жилийн өмнөхөөс 334 сая ширхэг буюу 13 хувиар нэмэгдсэн. Үнийн дүнгээр 64.4 сая ам.доллар зарцуулж, өмнөх оны мөн үеэс 16.6 хувиар өссөн.
• Электрон тамхи: 5.49 сая ширхэг болж, өмнөх оны мөн үеийн 3.6 сая ширхэгээс 51.8 хувиар нэмэгдсэн. Импортын үнийн дүн 64.5 хувиар өсөж, 16 сая ам.доллар давсан нь нийт импортын үнийн дүнгийн 20 орчим хувийг эзэлж байна.
• Халаадаг тамхи: 2025 оны эхний есөн сард 55,200 ширхэг байсан бол энэ онд 9.8 сая ширхэг болж, 177 дахин нэмэгдэв.

УИХ-ын 76 гишүүний өргөн мэдүүлсэн Тамхины хяналтын тухай хуулийн нэмэлт, өөрчлөлтийн төслийн эцсийн хэлэлцүүлгийг өнгөрсөн долдугаар сарын 2-нд парламентаар хэлэлцсэн ч батлалгүй үлдээсэн. УИХ-ын намрын чуулганаар тус хуулийг батлах хүлээлттэй байна. Хэрэв хуулийг баталбал одоогоор ямар нэгэн зохицуулалтгүй байгаа электрон болон халаадаг зэрэг шинэ төрлийн тамхин бүтээгдэхүүнүүд татвар төлдөг болж, насанд хүрээгүй иргэд худалдан авах боломжгүй болох зэрэг хуулийн зохицуулалттай болох юм.