СЗХ: Алтны захиалгын сурталчилгаагаар иргэдийг залилсан тохиолдол гарч байна

Цахим орчинд "алтны захиалга эхэллээ", "алтан эдлэл захиалга", "10 грамм алтны захиалгад 1 грамм алт бэлэглэнэ" гэх агуулга бүхий зар, сурталчилгаа нийтэлж, иргэдээс мөнгөн хөрөнгө урьдчилан авч хууль бус үйл ажиллагаа явуулсан тохиолдол удаа дараа гарч байгааг Санхүүгийн зохицуулах хороо мэдээллээ.

Иймд алт болон түүгээр хийсэн эдлэлийг цахим орчинд худалдан авах, захиалахдаа тухайн эдлэлд Монгол Улсын сорьцын баталгааны тэмдэг дарагдсан эсэхийг нягтлахыг зөвлөж байна. Мөн худалдаалж буй этгээд нь Санхүүгийн зохицуулах хорооноос олгосон үнэт металл, үнэт чулууны болон тэдгээрээр хийсэн эдлэлийн арилжаа эрхлэгчийн үйл ажиллагаа эрхлэх зөвшөөрөлтэй эсэхийг заавал шалгахыг анхааруулав. Зөвшөөрөлгүй этгээдийн дансанд урьдчилан төлбөр төлөх, аливаа гүйлгээ хийхээс татгалзахыг сануулж байна.

Иргэд хэт өндөр урамшуулал, ашиг амласан, бусдыг татан оролцуулахыг санал болгосон мэдээлэлд болгоомжтой хандаж, сэжигтэй үйл ажиллагааны талаар холбогдох эрх бүхий байгууллагад мэдээлэхийг СЗХ уриаллаа.

Иргэд дараах зүйлийг анхаарахыг зөвлөж байна:

• Зөвшөөрөлтэй эсэхийг шалгах;
• Монгол Улсын сорьцын баталгааны тэмдэг дарагдсан эсэхийг нягтлах;
• Худалдагчийн нэр, хаяг, холбоо барих мэдээллийг нягтлах;
• Хувь хүний дансанд урьдчилан мөнгө шилжүүлэхээс зайлсхийх;
• Хэт өндөр урамшуулал, ашиг амласан зар сурталчилгаанд болгоомжтой хандах;
• Сэжигтэй тохиолдолд баримт, цахим хуудасны мэдээлэл, дансны дугаар болон бусад мэдээллийг хадгалж, эрх бүхий байгууллагад мэдээлэх.