Сүү ХК шинэ үйлдвэрээ нээж, хүчин чадлаа хоёр дахин нэмэгдүүлэв

Сүү ХК-ийн шинэ үйлдвэр ашиглалтад орсноор хоногт сүү боловсруулах хүчин чадал 200 тонноос 400 тонн болж, хоёр дахин нэмэгдлээ. Энэ тухай үйлдвэрийн нээлтийн үеэр удирдлагууд онцолсон байна.

Таван жилийн өмнө малчид, фермерүүдээс жилд 16 сая литр сүү татан авдаг байсан бол өдгөө энэ тоо 32 сая литрт хүрч, мөн л хоёр дахин өссөн байна. Тус компани 68 жилийн туршлагатай бөгөөд шинэ үйлдвэрээ “SUU 2.0” гэж нэрлэжээ.

Шинэ үйлдвэрийн эрчим хүчний зарцуулалт 30–40 хувиар буурч, хүчин чадал өсөхийн зэрэгцээ үйлдвэрлэлийн хаягдал багасаж, бүтээгдэхүүний чанар, хүртээмж нэмэгдэх боломж бүрдсэн байна.

Сүү ХК Улаанбаатар хотоос 500 км-ийн радиуст 6 аймгийн 2,500 малчин, фермерээс түүхий сүү татан авдаг. Үйлдвэрийн даргын тайлбарласнаар, хүний шууд оролцоо 60 орчим хувиар буурч, ажилтнууд давтагддаг ажлуудаас чөлөөлөгдөн, бүтээгдэхүүн хөгжүүлэлт зэрэг илүү үнэ цэнтэй ажлуудад төвлөрөх боломжтой болжээ.

Шинэ үйлдвэр малчны хотноос ирсэн түүхий сүүг хүлээн авахаас эхлээд ариутгах, боловсруулах, савлах хүртэлх үндсэн дамжлагуудыг нэг цогц системд нэгтгэсэн, автоматжсан үйлдвэр аж. Сүүний чанарыг малчин, фермерүүдээс анх авахдаа шалгаж, чанарын үзүүлэлтээс хамааран тус тусад нь тасалгаанд авч явдаг гэнэ.

ХасБанк, Сүү ХК-ийн хамтын ажиллагаа 2013 онд эхэлж, 2019, 2021 онд ЕСБХБ-тай хамтран үйлдвэрийн шинэчлэл, сүү бэлтгэлийн системд санхүүжилт олгож байсан түүхтэй. Энэ удаагийн шинэ үйлдвэрийг ХасБанк дангаараа санхүүжүүлсэн байна.

“ХасБанкдаа баярлалаа” гэж Сүү ХК-ийн Гүйцэтгэх захирал Б.Гантулга нээлтийн үгэндээ хэлсэн.