Сунгаагүй сонгогчид 38.8 хувь: Ерөнхийлөгчийн сонгуулийн өрсөлдөөн нээлттэй хэвээр

2027 оны Ерөнхийлөгчийн сонгуульд нэр дэвших боломжтой улстөрчдийн дунд Н.Алтанхуяг, Г.Занданшатар нар тэргүүлж байгааг «National Opinion» судалгааны наймдугаар сарын үр дүн харуулжээ. Намуудын боломжит нэр дэвшигчдийг харьцуулсан асуултад оролцогчдын 25.9 хувь Н.Алтанхуягийг, 24.1 хувь Г.Занданшатарыг дэмжинэ гэж хариулсан байна.

Хоёр улстөрчийн зөрүү 1.8 хувийн нэгж байгаа нь нэгийг нь илт давуу гэж дүгнэхэд хангалтгүй. Гэвч хамгийн анхаарал татсан үзүүлэлт нь өөр — оролцогчдын 38.8 хувь нь сонголтоо хараахан хийгээгүй байна. Энэ нь сонгуулийн дүр зураг нэр дэвшигчдийн эцсийн бүрэлдэхүүн болон шийдээгүй иргэдийн сонголтоос шалтгаалан өөрчлөгдөх боломжтойг илтгэж байна.

АН-аас нэр дэвших боломжтой хүмүүсийн дунд Н.Алтанхуяг хамгийн өргөн дэмжлэгтэй гарчээ. Түүнийг оролцогчдын 14.0 хувь «бүрэн дэмжинэ», 29.3 хувь «дэмжинэ» гэж хариулсан бөгөөд эдгээрийн нийлбэр 43.3 хувь болж байна. Харин «зарим талаар дэмжинэ» гэсэн 15.7 хувийг нэмбэл нийт оролцогчдын 59.0 хувь ямар нэг түвшний эерэг хандлага илэрхийлжээ. «Дэмжихгүй» болон «огт дэмжихгүй» гэсэн хариулт нийлээд 34.1 хувь байна.

АН-аас санал болгосон бусад хүмүүсийн хувьд «бүрэн дэмжинэ» болон «дэмжинэ» гэсэн хоёр хариултыг нийлүүлбэл О.Цогтгэрэл 21 орчим хувь, С.Ганбаатар 21 орчим хувь, Б.Пүрэвдорж 20 орчим хувьтай байна. С.Баярцогт, Р.Амаржаргал, Л.Гантөмөр нарын хувьд энэ үзүүлэлт доогуур гарчээ.

МАН-аас нэр дэвших боломжтой хүмүүсийн үнэлгээгээр Г.Занданшатар тэргүүлсэн. Түүнийг оролцогчдын 8.8 хувь «бүрэн дэмжинэ», 22.6 хувь «дэмжинэ» гэж хариулсны нийлбэр 31.4 хувь болж байна. «Зарим талаар дэмжинэ» гэсэн 23.2 хувийг нэмбэл ямар нэг түвшинд дэмжсэн гурван хариултын нийлбэр 54.6 хувь болно. Харин түүнийг «дэмжихгүй» болон «огт дэмжихгүй» гэсэн хариулт нийлээд 40.2 хувь байна.

МАН-аас Л.Энх-Амгаланг «бүрэн дэмжинэ» болон «дэмжинэ» гэсэн хариулт нийлээд 24 орчим хувь, С.Бямбацогтынх 21.5 хувь байна. С.Амарсайхан дараагийн түвшинд, харин Ж.Энхбаяр, Б.Батцэцэг нарын дэмжлэг харьцангуй доогуур гарчээ.

Судалгааны үр дүнгээс харахад зөвхөн дэмжигчдийн тоо биш, эсэргүүцэгчдийн хэмжээ ч нэр дэвшигчийн боломжийг тодорхойлж байна. Зарим боломжит нэр дэвшигчийн хувьд «дэмжихгүй» болон «огт дэмжихгүй» гэсэн хоёр сөрөг хариултын нийлбэр 50, бүр 60 хувиас давсан. Тухайлбал АН-аас санал болгосон С.Баярцогт, Р.Амаржаргал, Л.Гантөмөр болон МАН-аас санал болгосон Ж.Энхбаяр, Б.Батцэцэгийн хувьд энэ үзүүлэлт 60 орчим хувь болон түүнээс дээш байна.

Гурван үзүүлэлтийг хамтатган харахад Н.Алтанхуяг, Г.Занданшатар нар одоогоор хамгийн хүчтэй байр суурьтай байгаа ч өрсөлдөөн хоёр хүний хооронд тогтсон гэж дүгнэх боломжгүй. Сонгогчдын 38.8 хувь сонголтоо шийдээгүй байгаа нь хамгийн том үзүүлэлт хэвээр байна.

«National Opinion» судалгаа нь нийгэм, эдийн засаг, улс төрийн болон цаг үеийн нөхцөл байдалд олон нийтийн санаа бодол цаг хугацааны явцад хэрхэн өөрчлөгдөж буйг ажиглах зорилготой. Судалгаанд нийслэл болон бүсчилсэн байдлаар сонгосон 11 аймгийн 18-аас дээш насны 1000 иргэнийг сар бүр хамруулж, оролцогчдыг нас, хүйс, байршлыг харгалзан түүврийн аргачлалаар сонгож, ярилцлагыг судлаач биечлэн авч, хариултыг таблет, компьютерт шууд бүртгэдэг CAPI арга ашигладаг.

Судалгааны бүрэн тайланд үзүүлэлтүүдийн сар бүрийн өөрчлөлт, хүн ам зүйн дэлгэрэнгүй задаргаа багтдаг.