Сөүлийн их сургуулийн профессор: Улаанбаатарт замгүй газар барилга барихгүй байх хэрэгтэй

Монгол Улс, БНСУ-ын хот төлөвлөгч, инженерүүдийн хамтарсан "Хот төлөвлөлтийн III форум" Чингис хаан үндэсний музейд болж байна.

Форумд Сөүлийн их сургуулийн профессор Ли Ин Гын илтгэл тавьж, Улаанбаатар хотын хөгжлийн асуудлаар санал бодлоо хуваалцлаа.

Тэрээр "Сөүлтэй харьцуулбал Улаанбаатарын иргэд том хэмжээний газар нутагт амьдарч байгаа. Улаанбаатар хотод замыг нэмэгдүүлж, нийтийн тээврээ хөгжүүлбэл хүн амьдрахад тохиромжтой хот болно. Зам байхгүй газар барилга барихгүй байх хэрэгтэй. Өөрөөр хэлбэл барилга барихын тулд эхлээд замын асуудлыг шийдэх нь чухал" гэж хэлэв.

Сөүл хотын туршлага

Профессор Ли Ин Гын Сөүл хотын хөгжлийн туршлагыг танилцуулахдаа хот анхнаасаа бэлэн баригдчихдаггүй, хамтран бүтээдэг гэдгийг онцлов. Дэлхийн ямар ч хот анхнаасаа хамгийн сайн төлөвлөлттэй байдаггүй бөгөөд дутагдалтай хэсгээ засаж сайжруулж явснаар хот хөгждөг гэв.

Сөүл хот 1965 онд анх ерөнхий төлөвлөлтөө хийж, таван сая хүн амтай байхаар төлөвлөж байсан ч 1990 оны эхээр 10 сая хүнтэй болж өссөн. Одоогоор Сөүл 9.7 сая хүн амтай. Энэ нь Улаанбаатар хоттой адил хүн амын хурдацтай өсөлтийн асуудал тулгарч байсныг харуулж байна.

Сөүл хот газар нутгийн хувьд тэгш бус, дов толгод ихтэй, Улаанбаатартай харьцуулахад давчуу байсан тул суурьшлыг харьцангуй гайгүй газруудад төлөвлөж, өндөр уултай хэсэгт хүн суурьшихгүйгээр төлөвлөсөн.

Мөн 1980-аад оны эхээр Сөүлийн иргэд нүүрс түлдэг байсныг газ руу шилжүүлж, утааны асуудлыг шийдсэн. 1970-аад оноос хойш метро барьж эхэлсэн бөгөөд одоо Сөүлийн хаана ч очсон 500 метрийн радиус дотор метроны буудал бий.

Улаанбаатар хотод замгүй газар барилга барихаас зайлсхийх хэрэгтэй.

Ли Ин Гын Улаанбаатар хотын замын асуудлыг онцолж, хангалттай хэмжээний замтай байх нь бүх зүйлийн эхлэл гэдгийг тэмдэглэв. Улаанбаатар хотын зам харьцангуй сийрэг, харин Нью-Йорк олон замтай байгааг харьцуулан харуулж, хот хангалттай замтай байх хэрэгтэй гэв.

Тэрээр Улаанбаатар хотын одоогийн нөхцөл байдалд зам маш дутагдалтай байгаа тул замыг хангалттай барих нь хамгийн чухал асуудал гэж мэргэжилтний хувьд үзэж байгаагаа илэрхийлэв.