Швейцарын иргэдийн 70 гаруй хувь төвийг сахих бодлогыг хэт хатуу тайлбарлахыг эсэргүүцлээ

Швейцарын иргэдийн үнэмлэхүй олонх нь тус улсын төвийг сахих уламжлалт гадаад бодлогыг хэт хатуу байдлаар тайлбарлахын эсрэг санал өгсөн байна.

Санал хураалтын албан ёсны дүнгээр иргэдийн 70 гаруй хувь нь Швейцар улсыг НҮБ-ын зөвшөөрөлгүйгээр аливаа хориг арга хэмжээнд нэгдэхийг хориглох санаачилгыг эсэргүүцжээ. Хэрэв санаачилга дэмжигдсэн бол тус улс НАТО-гийн цэргийн эвсэлтэй илүү уян хатан хамтран ажиллах боломжгүй болох байв.

Орос улс Украины нутаг дэвсгэрт халдан довтолсны дараа Швейцарын хэдэн зуун жил дагаж ирсэн эвсэлд үл нэгдэх, төвийг сахих бодлогын талаар маргаан сэргэсэн юм. Баруун жигүүрийн «Швейцарын Ардын Нам» төвийг сахих бодлогыг илүү чанга дагах санаачилгыг гаргасан бөгөөд үүнийг Оросын эрх баригчид ил тод дэмжиж байлаа. Санаачилга нь Швейцарыг Оросын эсрэг олон улсын хориг арга хэмжээнд нэгтгэхгүй байх зорилготой байжээ.

Холбооны засгийн газар болон бусад томоохон намууд уг санаачилгын эсрэг байсан.

Сонгогчид төвийг сахих бодлогоосоо татгалзаагүй ч Оросын эсрэг хориг арга хэмжээнд нэгдэхийг дэмжиж байгаагаа энэ санал хураалтаар харуулсан.

гэж «Gfs.bern» судалгааны хүрээлэнгийн захирал Лукас Голдер олон нийтийн SRF телевизийн сувгаар тайлбарлажээ.

«Швейцарын төвийг сахих бодлого ямар зорилготой талаар хүмүүс тодорхой ойлголттой байна» гэж тэр хэлсэн байна.

Швейцарын гадаад хэргийн сайд Игнасио Кассис телевизийн мэтгэлцээнд орохдоо «Төвийг сахих бодлогыг бид үргэлж тодорхой хэмжээний уян хатан байдлаар хэрэгжүүлж ирсэн билээ» гэжээ. Тус улс Украинд зэвсэг худалдахыг хориглосон шийдвэрээ цуцлах төлөвлөгөөгүй ч «төвийг сахих гэдэг нь үл тоомсорлохын нэр биш» гэж тэр тайлбарласан. «Бидний энх тайван амьдрах боломжийг олгодог олон улсын дүрэм журмыг зөрчиж байхад Швейцар улс зүгээр хараад суухгүй» гэж тэр мэдэгдсэн юм.

Швейцар нь 1815 онд Венийн конгрессоор «мөнхийн төвийг сахигч» улс гэдгээ хүлээн зөвшөөрүүлж байсан. 1907 онд Гаагийн конвенцоор төвийг сахих статусыг хуульчлан тодорхойлохдоо дайтаж буй улс орнуудад зэр зэвсэг нийлүүлэхгүй байхаар тогтоосон байдаг. Тус улс өмнө нь Украинд танкийн сум илгээх Германы засгийн газрын хүсэлтэд татгалзаж байжээ. Швейцар дэлхийн хоёрдугаар дайныг төвийг сахисан статустай туулсан ч нацистуудын дээрэмдсэн алтыг банкандаа хадгалж, жүүдийн дүрвэгчдийг хүлээж авахаас татгалзаж байв. 1990-ээд оны үед тус улс энэ бодлого, үйл ажиллагааныхаа төлөө уучлал гуйж байсан.

Швейцар улс шууд ардчиллын тогтолцоотой бөгөөд улс төрийн томоохон шийдвэрийг бүх нийтийн санал хураалтаар шийдвэрлэдэг.