Шинэ орон сууцны нэг м.кв дундаж үнэ 4.77 сая төгрөгт хүрлээ

Үндэсний статистикийн хорооны мэдээллээр 2026 оны наймдугаар сард шинэ орон сууцны нэг метр квадрат талбайн дундаж үнэ 4.77 сая төгрөг болсон байна.

Дүүргүүдээс хамгийн өндөр үнэ Сүхбаатар дүүрэгт бүртгэгдэж, нэг метр квадрат нь 5.51 сая төгрөгт хүрчээ. Харин өмнөх оны мөн үетэй харьцуулахад Сонгинохайрхан дүүрэгт 7.5 хувь буюу 250.9 мянган төгрөгөөр нэмэгдсэн бол Чингэлтэй дүүрэгт 11.5 хувь буюу 526.4 мянган төгрөгөөр буурсан байна. Чингэлтэй дүүрэгт 2025 оны наймдугаар сард уг үзүүлэлт 4.57 сая төгрөг байжээ.

Орон сууцны насжилтаар авч үзвэл, өмнөх оны мөн үетэй харьцуулахад шинэ орон сууцны үнэ 5.1 хувь, хуучин орон сууцны үнэ 8.1 хувиар тус тус өссөн байна. Харин өмнөх сартай харьцуулахад шинэ орон сууцны үнэ 2.2 хувь, хуучин орон сууцны үнэ 2.4 хувиар өсжээ.

Өнгөрсөн сард хуучин орон сууцны нэг метр квадрат талбайн дундаж үнэ 4.78 сая төгрөг болж, Сүхбаатар дүүрэгт хамгийн өндөр буюу 5.82 сая төгрөгт хүрсэн байна. Хуучин орон сууцны дундаж үнэ өмнөх оны мөн үетэй харьцуулахад Баянзүрх дүүрэгт 11.6 хувь буюу 475.4 мянган төгрөгөөр өссөн аж.

Байршлаар авч үзвэл, Сүхбаатар дүүргийн Сүхбаатарын талбай, 220 мянгат орчмын нэг метр квадрат 7.89 сая төгрөг байгаа нь хамгийн өндөр, Сонгинохайрхан дүүргийн 21-р хороолол орчим 3.30 сая төгрөг байгаа нь хамгийн хямд үзүүлэлт болжээ.

Туршилт тооцоогоор 2026 оны наймдугаар сард нэг өрөө орон сууцны түрээсийн дундаж үнэ 1.40 сая төгрөг, хоёр өрөөнийх 1.93 сая төгрөг, гурван өрөөнийх 3.03 сая төгрөг байна.

Түрээсийн дундаж үнийг байршлаар нь харвал 1-3 өрөө байр Сүхбаатар дүүрэгт 1.72-3.73 сая төгрөг байгаа нь хамгийн өндөр, Сонгинохайрхан дүүрэгт 1.06-1.72 сая төгрөг байгаа нь хамгийн хямд байна.