Ши Жиньпиний нэрээр нэрлэгдсэн ресторанд халдлага үйлдэж, сэжигтнүүд Хятад руу зугтжээ

Өмнөд Солонгосын Соннам хотод үйл ажиллагаа явуулдаг, Хятадын дарга Ши Жиньпиний нэрээр нэрлэгдсэн ресторанд Хятадын иргэд халдаж, дараа нь эх орон руугаа зугтсан гэж тус улсын цагдаагийн байгууллага мэдээлсэн байна.

Сөүлийн өмнөд хэсэгт орших тус хотын рестораны хяналтын камерт есдүгээр сарын 24-ний үүрээр нүүрээ халхалсан дөрвөн эрэгтэй орж ирээд тавилгыг эвдэж, будаг цацаж байгаа нь бичигдсэн байна.

Рестораны эзэн орон нутгийн хэвлэлд ярилцлага өгөхдөө Өмнөд Солонгос дахь Хятад хоолны хамгийн шилдэг ресторан болохыг хүссэн учраас Ши Жиньпиний нэрийг сонгосон бөгөөд ямар ч улс төрийн зорилго байгаагүй гэдгийг онцолжээ.

Найман жил үйл ажиллагаа явуулж буй уг ресторан сүүлийн нэг жилийн хугацаанд л нэрээ солих шаардлагатай болсон тухай «The Chosun Daily» сонин мэдээлсэн байна.

Өмнөд Солонгост болох Ази-Номхон далайн эдийн засгийн хамтын ажиллагааны (APEC) дээд хэмжээний уулзалтад Ши Жиньпин оролцох тухай мэдээлэл гарсны дараа, өнгөрсөн оны наймдугаар сард нэрээ солихыг шаардсан олон арван утасны дуудлага хүлээн авснаа эзэн нь ярьжээ. Зарим хүн бүр мөнгө санал болгож байсан гэнэ.

«Хятадад бизнес эрхэлдэг гэх хүмүүс нэрээ сольсон тохиолдолд их хэмжээний мөнгө өгөх санал тавьж байсан»

гэж тэрбээр ярьсан бөгөөд тэд маш тууштай шаардаж байсныг дурсжээ.

Энэ оны дөрөвдүгээр сард хэн нэгэн тус рестораны цэсэнд байдаг «Ши Жиньпиний тусгай будаа» (Xi Jinping Special Rice) хоолны нэрийн талаар Өмнөд Солонгосын оюуны өмчийн газарт гомдол гаргасан ч ямар нэгэн зөрчил илрээгүй тул үл хэрэгссэн байна.

Рестораны эзэн өнгөрсөн долоо хоногт болсон халдлага нь сүүлийн нэг жилд тохиолдсон хамгийн ноцтой хэрэг байсныг хэлээд, эд хөрөнгийн хохирол ойролцоогоор 15 сая вон (11,100 ам.доллар) хүрсэн гэж орон нутгийн хэвлэлд ярьжээ.

Халдлагын дараа «Ши Жиньпин» ресторан таван өдөр хаалттай байгаад мягмар гарагт дахин нээгдсэн байна. Эзэн нь одоо багийнхантайгаа хамтран рестораныхаа шинэ нэрийг сонгохоор судалж байгаа гэнэ.

Цагдаагийн байгууллага мягмар гарагт мэдээлснээр, сэжигтэн дөрвөн хүн нь 20-40 насны Хятад улсын харьяат эрэгтэйчүүд байжээ. Тэднийг халдлага үйлдсэнийхээ дараа Шанхай болон Шаньдун мужийн Янтай хотууд руу явсан гэж үзэж байгаа бөгөөд Өмнөд Солонгосын цагдаа тэднийг эрэн сурвалжлахын тулд Интерполд хүсэлт гаргахаар төлөвлөжээ.

Цахим орчинд тархсан зургуудаас үзэхэд «Ши Жиньпин» (Xi Jinping) ресторан Хятад хоолны өргөн сонголттойгоос гадна Өмнөд Солонгос хоол ч санал болгодог юм байна. Google-ийн хэрэглэгчид тус ресторанд таван одноос дунджаар дөрвөн одны үнэлгээ өгчээ.