Шатрын олимпиад: Монголын эмэгтэйчүүд Казахстантай тэнцэж, дөрөвдүгээрт жагсаж байна

Узбекистаны Самарканд хотноо Олон Улсын Шатрын Холбоо (FIDE)-ноос зохион байгуулж буй 46 дахь удаагийн олимпиад энэ сарын 27-ныг дуустал үргэлжилж байна. Нийт 189 орны шатарчид өрсөлдөж буй тус тэмцээнд Монголын эмэгтэй шатарчид чансаа дээгүүр явж байна.

Наймдугаар тойрогт Болгарыг 2.5:1.5-аар буулган авсны дараа есдүгээр тойрогт манай тамирчид тэмцээнийг тэргүүлэгчдийн нэг Казахстаны багтай учраа таарлаа. Эмэгтэй их мастер Т.Мөнхзул, олон улсын мастер Б.Мөнгөнзул нар өрсөлдөгчөө бараагүй бол мастер Х.Баясгалан, их мастер Б.Мөнгөнтуул нар бүтэн оноо авснаар хоёр баг эвийн гэрээ байгууллаа.

Ингэснээр нийт есөн өргийн дараа эмэгтэйчүүдийн багийн дүнгээр БНХАУ 17 оноогоор тэргүүлж, Энэтхэг, Казахстан, Монголын баг ижил 15 оноогоор удаалж байна. Гэхдээ Энэтхэг долоон хожил, нэг тэнцээ, нэг ялагдсан үзүүлэлтээр хоёрдугаарт, Казахстан зургаан хожил, гурван тэнцээтэйгээр гуравдугаарт, монголчууд долоон хожил, нэг хожигдол, нэг тэнцээгээр дөрөвдүгээрт жагсаж байна.

Дараагийн өрөгт манай охид долоод бичигдэж буй Польшийн багтай өнөөдөр тоглоно. Түүнчлэн манай гурван шатарчин ширээндээ шилдэг 15-д бичигдэж байна. Тодруулбал нэгдүгээр ширээнд Б.Мөнгөнзул 13-т, гуравдугаар ширээнд Х.Баясгалан тавдугаарт, дөрөвдүгээр ширээнд Б.Мөнгөнтуул 13-т жагсаж байна.