Шахмал түлш маргаашаас худалдаанд гарна

2026-2027 оны халаалтын улирал 2026 оны 9 дүгээр сарын 15-нд эхэлж, шахмал түлш худалдаанд гарна. Нийслэлийн долоон дүүргийн хэмжээнд борлуулалтын 500 цэг ажиллуулахаар шийдвэрлэсэн бөгөөд 446 нь байнга ажиллах, 54 нь нөөцөд байна.

Шахмал түлш худалдан борлуулах цэг ажиллуулахаар 734 хүсэлт ирснээс 446 иргэнтэй гурвалсан гэрээ байгуулж, худалдаанд гаргахад бэлэн болжээ. Цэгүүдийг сонгон шалгаруулахдаа 7 дүүргийн Засаг даргын Тамгын газрын Агаарын бохирдлын эсрэг тэмцэх тасаг, хороодоос санал авч, тухайн дүүргийн төлөөлөл, Тавантолгой түлш ХХК-аас бүрдсэн ажлын хэсэг газар дээр нь ажиллаж, шаардлага хангасан иргэдтэй гэрээ байгуулсан байна.

25 килограммын савлагаатай нэг шуудай шахмал түлш 3,750 төгрөгөөр худалдаалагдана.

Энэ жил айл өрхүүдэд 300 мянга гаруй тонн хагас коксон түлш, 80 мянган тонн шахмал түлш борлуулах бол аж ахуйн нэгжүүдэд 40 мянган тонн савласан мидлинг нийлүүлэх юм байна.

Түлш борлуулах цэгүүдийн байршлын мэдээллийг хүргэх болно.