Сэтгэл зүйч: Хүүхдээ цэцэрлэгт нууцаар орхих нь хамгийн буруу

2026-2027 оны хичээлийн жилд улсын хэмжээнд 76 мянга орчим хүүхэд нэгдүгээр ангид элсэн суралцаж, 242 мянга гаруй хүүхэд цэцэрлэгт хамрагдах гэж байна.

Хүүхдийн сэтгэл зүйч Ч.Сумъяа шинэ орчинд дасан зохицох үед эцэг эхчүүдийн анхаарах зүйлсийн талаар ярилцлага өглөө.

Анх удаа цэцэрлэгт орж буй хоёр настнууд айдас, тодорхойгүй байдлыг мэдэрдэг гэж тэрээр хэлээд, хүүхдээ орхих үед гаргадаг түгээмэл алдааг онцлов.

Цэцэрлэгт өгчхөөд зугтах эсвэл харагдахгүй нууцаар орхиж явах нь хамгийн буруу зүйл. Хаашаа явах гэж байгаагаа, хэзээ ирж авахаа заавал тайлбарлаж үлдээх хэрэгтэй.

Цэцэрлэг, сургуульд орохоос өмнө хүүхдэд очих газраа ойлгуулж, зураг, бичлэг үзүүлэн дасгах нь тустай гэж тэрээр зөвлөлөө. Мөн гэр бүлийн орчинд цэцэрлэг болон багшийн талаар эерэг ойлголт өгөх шаардлагатайг дурдав.

Гэрийн даалгаврын хэт дарамт

Нэгдүгээр ангийн сурагчдын гэрийн даалгаврыг хэт чухалчлан хүлээж авах нь хүүхдэд сурах айдас төрүүлдэг гэж Ч.Сумъяа ярилаа.

Нэгдүгээр ангийн сурагчдын гэрийн даалгаврын хэт ач холбогдол өгч хүлээж авах нь хүүхдэд сурах айдас өгдөг.

Даалгаврыг хөнгөн, сонирхолтой байдлаар хийлгэж, сурах боломж гэдгийг ойлгуулах нь чухал бөгөөд төгсөх мэт шахах нь хүүхдийг залхаадаг гэж тэрээр тайлбарлав. Хуруу, гарны хөгжлөөс эхлээд олон хүүхэд дунд ойлгохгүй өнгөрөх тохиолдол бий бөгөөд энэ нь муу сурна гэсэн үг биш гэлээ.

Богино бичлэг ба анхаарал

Богино бичлэг үзэх нь зөвхөн хүүхдэд төдийгүй томчуудад ч нөлөөлдөг, харин хүүхдүүдэд бүр ч эрсдэлтэй гэж тэрээр хэлэв.

Богино бичлэг үзэхэд дараагийн бичлэг рүү маш хурдан шилждэг учраас анхаарал төвлөрөх чадварт нөлөөлдөг.

Дэлгэцийн хэрэглээг хязгаарлахын тулд эцэг эхчүүд өөрсдөө үлгэрлэх нь чухал гэж Ч.Сумъяа зөвлөлөө. Гэр бүлээрээ байхдаа өөрсдөө утсаа оролдоод байвал хүүхдүүд даган дуурайдаг гэдгийг тэрээр онцлов. Хүүхэдтэйгээ ярилцахдаа шүүмжлэлгүйгээр өөрөө ярих боломж олгох нь хамгаалагдсан мэдрэмж төрүүлж, тусламж хэрэгтэй үед бид нар байгаа гэдгийг ойлгуулдаг гэж тэрээр нэмж хэлэв.