Сербийн ерөнхийлөгч Вучич огцорч, улс орноо сонгуулийн улиралд оруулав

Серби улсын ерөнхийлөгч Александр Вучич ням гарагт албан тушаалаасаа огцорсноо зарлав. Энэ нь оюутнуудын удирдсан, жил гаруй үргэлжилсэн эсэргүүцлийн дараа болсон юм.

Белград хотын ерөнхийлөгчийн ордны гадаа цугласан дэмжигчдэд хандан тэрбээр сүүлийн есөн жилийн засаг захиргааны үед энх тайван, тогтвортой байдлыг хадгалж чадснаа онцлов.

Вучич зургаадугаар сард огцрох санаагаа анх илэрхийлж байсан бөгөөд ирэх парламентын сонгуульд намаасаа ерөнхий сайдын суудалд нэр дэвшихээр шийдвэрлэсэн тул ийнхүү албан тушаалаа өгч байна. Сербийн үндсэн хуулиар түүнд ерөнхийлөгчийн сонгуульд гурав дахь удаагаа нэр дэвших эрх олгогдоогүй юм.

2024 онд Нови Сад хотын төмөр замын өртөөний дээвэр нурж, 16 хүн амиа алдсаны дараа Вучичийн засаг захиргааг эсэргүүцсэн жагсаал тэмцэл эхэлж байв. Авлигад идэгдсэн албан тушаалтнууд чанаргүй байгууламж барьснаас осол гарсан гэж иргэд үзэж байв.

Оюутнууд эсэргүүцлийн жагсаалыг манлайлж, ажилчид, тариаланчид зэрэг нийгмийн бүх давхаргын төлөөлөгчид тэднийг дэмжин нэгдсэн. Вучичийн удирдлага дор ажиллаж байсан хэд хэдэн өндөр албан тушаалтан огцорсон ч иргэдийн бухимдлыг намжааж чадаагүй. Жагсаал тэмцэл өнгөрсөн зуны турш үргэлжилж, цагдаатай хүчтэй мөргөлдсөний улмаас эмх замбараагүй байдал үүссэн.

Александр Вучичийн бүрэн эрхийн хугацаа ирэх онд дуусах байв.

Сербийн хуулиар ерөнхийлөгч огцорсноос хойш гурван сарын дотор ээлжит бус сонгууль зохион байгуулах ёстой. Ингэснээр иргэд он дуусахаас өмнө хоёр өөр сонгуульд саналаа өгөх болж байна.

Парламентын ээлжит бус сонгуулийн санал хураалт аравдугаар сарын сүүлээр болох бол, үүнээс сар гаруйн дараа ерөнхийлөгчийн ээлжит бус сонгуулийн санал хураалт болно гэж Вучич өчигдөр мэдэгдсэн.

Парламентын дарга Анна Брнабич шинэ ерөнхийлөгч сонгогдох хүртэл үүрэг гүйцэтгэгчээр ажиллана.

Сербийн олон нийтийн RTS телевизийн мэдээлснээр Вучич үндсэн хуулиар олгогдсон эрх мэдлээ ашиглан 49 хүнд өршөөл үзүүлсэн бөгөөд түүний тодорхойлсноор “сүүлийн нэг жил хагасын хугацаанд бидний туулж өнгөрүүлсэн аймшигт үйл явдал”-тай холбоотой 23 оюутан болон өөрийнх нь намын зүтгэлтнүүд багтжээ.

Ирэх парламентын сонгуульд Вучичийн эрх баригч Дэвшилтэт Нам авлигын эсрэг оюутнуудын тэргүүлсэн “Оюутнууд ялна” хөдөлгөөн болон Өрнөдийн талыг баримтлагч сөрөг хүчнүүдийн “Европын Серби” эвсэлтэй өрсөлдөнө.

2014 онд ерөнхий сайд болсон Вучич 2017 онд анх удаа ерөнхийлөгч болсноосоо хойш тасралтгүй ажилласан. Тэрбээр Сербийг Европын Холбоонд элсүүлэхийн зэрэгцээ Оростой ойр дотно харилцаагаа хадгалж, Хятадын хөрөнгө оруулагчдад улс орноо нээх бодлого баримталж ирсэн.