СЕХ: 2027 онд зургаан нам, эвсэлд 7.5 тэрбум төгрөг олгоно

Сонгуулийн ерөнхий хорооны 2026 оны 9 дүгээр сарын 14-ний өдрийн хуралдаанаар Улсын Их Хурлын 2024 оны ээлжит сонгуулиар сонгогчдын нэрийн жагсаалтад бүртгэгдсэн нийт сонгогчийн нэг ба түүнээс дээш хувийн санал авсан нам, эвсэлд 2027 онд олгох төрийн санхүүжилтийн дээд хэмжээг хэлэлцэн тогтоосон байна.

Санхүүжилтийн дээд хэмжээг тогтоохдоо тухайн намын Улсын Их Хурлын сонгуулиар авсан саналын тоо, Улсын Их Хуралд авсан суудлын тоог үндэслэн нэг сарын хөдөлмөрийн хөлсний доод хэмжээг хуульд заасан хувь хэмжээгээр үржүүлэн тооцдог аж.

Ирэх онд улс төрийн зургаан нам, эвсэлд нийт 7.5 тэрбум төгрөгийн санхүүжилтийг улсын төсвөөс олгохоор тогтоосон бөгөөд хуваарилалт нь дараах байдалтай байна:

• Монгол Ардын Нам - 3,363,948,720₮
• Ардчилсан Нам - 2,568,083,760₮
• ХҮН Нам - 756,799,560₮
• Үндэсний Эвсэл - 376,976,160₮
• Иргэний Зориг Ногоон Нам - 368,303,760₮
• Үнэн Ба Зөв Нам - 161,500,680₮

Нам, эвслийн 2026 оны санхүүгийн тайланг хуульд заасны дагуу хувийн аудитын байгууллага, Сонгуулийн ерөнхий хороо, Үндэсний аудитын газар хянаж, дүгнэлт гаргасны дараа хянагдсан тайлан дахь орлогын дүнгээс хамааруулж, төрөөс олгох санхүүжилтийг 2027 оны 5 дугаар сард багтаан эцэслэн тогтооно.

Улсын Их Хурлын 2024 оны ээлжит сонгуулиар долоон нам, эвсэл сонгогчдын нэрийн жагсаалтад бүртгэгдсэн нийт сонгогчийн нэг ба түүнээс дээш хувийн санал авсан ч Улсын дээд шүүхийн Нийт шүүгчийн 2026 оны 6 дугаар сарын 22-ны өдрийн 66 дугаар тогтоолоор "ШИНЭ нам"-ыг бүртгэлгүйд тооцсон тул Улс төрийн намын тухай хуулийн 27 дугаар зүйлийн 27.11, Монгол Улсын Их Хурлын сонгуулийн тухай хуулийн 27 дугаар зүйлийн 27.10-д тус тус заасны дагуу Шинэ нэгдсэн эвсэлд олгох төрийн санхүүжилтийг зогсоосон байна.