Сангийн сайд: Оюутолгойн ногдол ашгийг нэг удаагийн хуулиар зохицуулж, эрчим хүчийг шийднэ

УИХ-ын Төсвийн байнгын хорооны өнөөдрийн хуралдаанаар "Монгол Улсын 2027 оны төсвийн тухай хуулийн төсөлтэй хамт өргөн мэдүүлсэн хууль, тогтоолын төслүүд"-ийг хэлэлцэж байна. Хуралдаанд Оюутолгойн ногдол ашгийг хэрхэн зарцуулах асуудал хөндөгдсөн бөгөөд 2027 онд тус төслөөс гурван их наяд төгрөгийн ногдол ашиг авахаар төлөвлөж байна.

УИХ-ын гишүүн Б.Жаргалан: "Засгийн газар төсвийн төсөл өргөн мэдүүлэхдээ одоо хүчин төгөлдөр мөрдөгдөж байгаа Үндэсний баялгийн сангийн тухай хуулиа мөрдөхгүйгээр Оюутолгойн ногдол ашгийн хоёр их наяд төгрөгийг төсвийн зарлага тал дээр оруулж ирсэн бэ. Эрх зүйн үндэслэл нь юу вэ гэдэгт тодорхой хариулт өгмөөр байна. Нийгмийн болоод суурь дэд бүтцийн тулгамдаж буй асуудлыг шийдвэрлэх тухай гээд ганц хуудас нэг удаагийн шинжтэй хууль Үндэсний баялгийн сангийн тухай хуулийн 11.2-ыг үгүйсгэхгүй" гэлээ.

Сангийн сайд З.Мэндсайхан: "Оюутолгойн ногдол ашгийг ямартай ч аваад ирье гэдэг шийдэл рүү орсон. Засгийн газраас 2027 оны төсөв дээр Оюутолгойн ногдол ашгийг оруулж ирэхдээ нэг их наяд төгрөгийг Үндэсний баялгийн сангийн хуулийн дагуу Хуримтлалын санд төвлөрүүлнэ. Хуримтлалын санд 2030 он хүртэл мөнгө хуримтлуулах ёстой" гэв.

Тэрбээр: "Уул уурхайн орлогын огцом өсөлтийг төсөвтөө тусгаад явбал гарах эрсдэл нь энэ улсыг хөмөрнө. Тиймээс уул уурхайн үнийн өсөлтийг төсөвт авахгүйгээр Тогтворжуулалтын санд оруулдаг" гэж нэмж хэлсэн.

Мөн З.Мэндсайхан: "Дулааны станц бариад Засгийн газар хэрэглэхгүй. Дулааны зургаадугаар цахилгаан станц буюу 'ДЦС-VI'-г бариад Засгийн газар хэрэглэхгүй Монголын ард түмэн хэрэглэнэ. Эрчим хүчний салбарыг эхний ээлжид шийдвэрлэе. Хөрөнгө оруулалтаар дамжаад иргэдэд хүргэж байгаа. 'ДЦС-VI'-г төр хувийн хэвшлийн хүрээнд бариад төрийн оруулсан хувь хэмжээгээр иргэдэд хувьцаа олгоно" гэлээ.

Түүнчлэн: "Засгийн газар Оюутолгойн ногдол ашгийн хоёр их наяд төгрөгийг авч хэрэглэх гээд байгаа асуудал огт биш. Оюутолгойгоос орж ирэх мөнгийг арван аймгийн дуусаагүй цахилгаан станцын төслийг санхүүжүүлнэ гэж цоллоод байна" гэв.

Сангийн сайд: "10 аймгийн дулааны цахилгаан станцын гүйцэтгэгч компани буюу Солонгосын талын алдаанаас болж Монголын иргэд хохирч болохгүй. Солонгосын зээлээр дуусгая гэхэд төсөвт өртөг нь хоёр дахин нэмэгдэх гэж байна" гэж хэлсэн.

З.Мэндсайхан: "Оюутолгойн ногдол ашгийг нэг удаагийн шинжтэй хуулиар зохицуулж, эрчим хүчний асуудлаа бүрэн шийднэ. 40 хувийн гүйцэтгэлтэй байгаа 10 аймгийн дулааны цахилгаан станцыг балгас болгоод хаях уу эсвэл дуусгаад иргэдийн эрчим хүчний хэрэглээг хангах уу" гэж мэдэгдлээ.