Сангийн сайд: 11-р сарын 1-нээс ахмадуудын тэтгэврийг нэмэх хуулийн зохицуулалт хийсэн

Сангийн сайд З.Мэндсайхан цаг үеийн асуудлаар мэдээлэл өглөө. Тэрээр Төсвийн тодотголд Засгийн газраас хоёр бодлого оруулж ирж байгааг хэлэв. Гадаад орчинд нефть, эрчим хүчний үнэ өссөнөөр импортын бараа бүтээгдэхүүний үнэ нэмэгдэж, үүнийг дагаад дотоодын бараа бүтээгдэхүүний үнэ өсөж байна.

Түүний хэлснээр, 7-р сард инфляц 13 хувьтай байсан бөгөөд үүний 50 хувийг мах, хүнсний ногоо, гурил эзэлж байна. Иргэдийн инфляцад идэгдсэн орлогыг дэмжих, инфляцад өртөж буй бүтээгдэхүүний нөөц бүрдүүлэх гэсэн хоёр чиглэлийг төсвийн тодотголд оруулж ирж байгаа аж.

Мөн багш нарын төсөвт суугаагүй цалингийн зардлыг Засгийн газрын зардлыг танаж шийдвэрлэнэ. Эрүүл мэндийн салбарын ажилчдын цалинг 11-р сараас 20 хувиар нэмэхээр тооцоод зардлыг нь шийдсэн байна.

Энэ хүрээнд ахмадуудын тэтгэвэр 100-300 мянган төгрөгөөр нэмэгдэж байгаа. Ирэх оны 1-р сарын 1-ээс хэрэгжихээр байсан. Харин ахмадууд үнийн өсөлтөд хүчтэй нэрвэгдэж байгаа учраас 11-р сарын 1-ээс хэрэгжихээр хуулийн зохицуулалт хийж, төсвийг нь тооцоолж орж ирсэн. Үүнд 450 мянган ахмадууд хамрагдана.