С.Цэнгүүний 397 тэрбум төгрөгийн зардал танах 24 санал дэмжигдсэнгүй

Өнөөдрийн Төсвийн байнгын хорооны хуралдаанд УИХ-ын гишүүн С.Цэнгүүний сайд нарын төсвийн тодотголоор нэмэгдүүлсэн урсгал зардлыг танах тухай саналыг хэлэлцсэн. Гэвч саналууд бүгд дэмжигдсэнгүй.

Эдгээр саналууд нь сайд нарын урсгал зардлыг нийт 397 тэрбумаар танах байв.

Саналуудын дотор бичиг хэргийн зардлыг 768.7 сая төгрөгөөр, гадаад томилолтын зардлыг 1.5 тэрбумаар, дотоод томилолтын зардлыг 2.4 тэрбумаар, зочид төлөөлөгчдийг хүлээж авах зардлыг 812.7 сая төгрөгөөр, тээврийн хэрэгслийн татвар, оношилгооны зардлыг 171.7 сая төгрөгөөр тус тус хасах санал багтжээ.

Мөн төрийн өмчит байгууллагуудад олгох татаасыг 391 тэрбумаар, хувийн хэвшлийн байгууллагуудад олгох татаасыг 134.6 сая төгрөгөөр хасах санал гаргасан.

Мөн 17 яамны зардлыг нийт 11.7 тэрбумаар бууруулах санал гаргасан юм. Эдгээр саналыг хуралдаанд оролцсон 19 гишүүний 2-3 нь л дэмжиж байв.

Яамд тус бүрийн нэгдсэн төсөл хэрэгжүүлэх нэгжийн зардлыг хасах саналууд багтсан байна. Тухайлбал, Эдийн засаг хөгжлийн яамны 554.3 сая, Шадар сайдын 337.2 сая, Байгаль орчин, уур амьсгалын өөрчлөлтийн яамны 382.9 сая, Боловсролын яамны 571.2 сая, Гэр бүл, хөдөлмөр нийгмийн хамгааллын яамны 361.7 сая, Зам тээврийн яамны 589.9 сая, Сангийн яамны 658.9 сая төгрөгийг хасах санал дэвшүүлсэн.

Түүнчлэн Соёл, спорт, аялал жуулчлал, залуучуудын яамны 278.9 сая, Хот байгуулалт, барилга, орон сууцжуулалтын яамны 1 тэрбум 70 сая, Хууль зүй, дотоод хэргийн яамны 365.6 сая, Хүнс, хөдөө аж ахуй, хөнгөн үйлдвэрийн яамны 502.9 сая, Цахим хөгжил, инноваци, харилцаа холбооны яамны 296.2 сая, Эрүүл мэндийн яамны 493.7 сая, Эрчим хүчний яамны 1.1 тэрбум, Нийслэлийн нэгдсэн төсөл хэрэгжүүлэх нэгжийн 797 сая төгрөгийг тус тус хасах санал гаргасан.

Мөн Цагдаагийн ерөнхий газрын сэргээн засах 810-р тусгай салбарын 2.4 тэрбумын урсгал зардал, Шүүхийн шийдвэр гүйцэтгэх ерөнхий газрын түр хурах, нөхөн сэргээх сувиллын 924.6 сая төгрөгийн урсгал зардлыг хасах саналыг оруулсан.