Qantas нислэгээ бясааны улмаас цуцалж, зорчигчдод уучлалт гуйв

Италиас Австрали руу явах байсан Qantas компанийн нислэг Бямба гарагт цуцлагдсан. Шалтгаан нь онгоцны дотор бясаа илэрсэн явдал байв.

"Sydney Morning Herald" сонины мэдээлснээр, өмнөх өдөр буюу Баасан гарагт Пертээс Ром руу чиглэсэн 17 орчим цагийн нислэгийн үеэр зарим зорчигч шавжид хазуулсан гэж гомдолложээ.

Нислэгийн багийнхан хазуулсан хэсгийн загатнааг намдаахын тулд харшлын эсрэг эм өгсөн ч эмийн нөөц дууссан байна.

Qantas-ийн хэвлэлийн төлөөлөгчийн хэлснээр, Boeing 787 Dreamliner загварын онгоцыг "нарийвчилсан цэвэрлэгээ" хийхээр түр ашиглалтаас гаргахаас өөр аргагүй болжээ.

Тус төлөөлөгч "Энгийн ангиллын цөөн тооны суудалд асуудал илэрсний дараа инженер, засвар үйлчилгээний баг онгоцонд нарийвчилсан цэвэрлэгээ хийх болсон тул Бямба гарагт Ромоос Перт рүү хийх нислэгийг цуцлахад хүрсэнд үйлчлүүлэгчдээсээ чин сэтгэлээсээ уучлалт хүсэж байна" гэжээ.

Qantas компани аялал нь саатсан бүх зорчигчийг байрлалаар хангаж, анх төлөвлөсөн нислэгийн цагаас хойш 48 цагийн дотор өөр нислэгт шилжүүлэн суулгаснаа мэдэгдсэн.

Бясаа нь хувцас, тавилга, ор дэрний хэрэгсэл дунд амьдрах чадвартай, далавчгүй, жижиг шимэгч хорхой юм.

Мэргэжлийн байгууллагуудын мэдээлснээр, тэдний хазалт загатнаа үүсгэдэг ч эрүүл мэндэд ноцтой аюул учруулах нь ховор. Гэхдээ бясаанаас салах нь хэцүү, зардал ихтэй ажил юм.

Тэдэнтэй тэмцэхдээ ор дэрний хэрэгсэл, хувцас, хөшиг зэрэг гэрийн эд зүйлсийг халуун усаар угааж, хатаагчаар хатаах, эсвэл гялгар уутанд хийж хөлдөөгчид 3-4 хоног байлгах зэрэг аргыг хэрэглэдэг.

Бясаанаас шалтгаалан аялал жуулчлал, тээврийн үйл ажиллагаа саатах тохиолдол өмнө нь ч гарч байв. Хоёр долоо хоног хүрэхгүй хугацааны өмнө Англид галт тэрэгний жолооч нар бүхээг дотроосоо ийм шавж олсны улмаас Southeastern компанийн хэд хэдэн галт тэрэгний аялал цуцлагдаж байжээ.

2017 онд Ванкуверээс Лондон руу ниссэн гэр бүлээс British Airways компани уучлалт гуйж байсан. Учир нь уг шөнийн нислэгийн үеэр тус гэр бүлийнхэн бясаанд олон удаа хазуулж байжээ.

Мөн өнгөрсөн жил Turkish Airlines компани онгоцны суудлаас бясаа илэрсэн хэд хэдэн тохиолдол гарсан ч хариу арга хэмжээ аваагүй гэсэн шүүмжлэлд өртөж байв.