PISA-2025: Монгол сурагчдын математик, унших чадвар тогтвортой, байгалийн ухаанд ахиц гаргажээ

Монгол Улс 2025 онд Сурлагын Амжилтын Олон Улсын Үнэлгээ (PISA)-д хамрагдсан. Энэ удаагийн үнэлгээнд дэлхийн 91 улсын 760 мянга гаруй суралцагч оролцсон бөгөөд Монгол Улсаас 191 сургуулийн 7,146 суралцагч оржээ. Үр дүнг Боловсролын яамны Төрийн нарийн бичгийн дарга Т.Ням-Очир өнөөдөр танилцуулсан.

Математикийн гүйцэтгэлээр Монгол Улсын оноо 419 байгаа нь OECD-ын дундаж (463) болон Азийн дундажаас (439) доогуур байна. Харин 2022 онд 425 байсан бол 2025 онд 419 болж бага зэрэг буурчээ. Математикаар 91 улсаас 49-д эрэмбэлэгдсэн байна.

Унших чадварын гүйцэтгэл

Унших чадварын хувьд Монголын суралцагчдын оноо 374 бөгөөд OECD-ын дундаж (461), Азийн дундаж (413)-аас доогуур байна. 91 улсаас 70 дугаар байранд эрэмбэлэгдсэн нь тогтвортой үзүүлэлт юм. Харин яаран, өнгөц унших хандлагатай сурагчдын эзлэх хувь 8.6-аас 10.1 хувь болж өссөн нь дижитал уншлагад шилжилт нөлөөлж болзошгүй гэжээ.

Байгалийн ухааны гүйцэтгэл

Байгалийн ухаанаар Монголын суралцагчдын оноо 424 болж өссөн нь анхаарал татаж байна. 2022 онд 412 байсан бол 2025 онд 424 болж нэмэгдсэн. Энэ үзүүлэлтээр үсрэнгүй амжилт үзүүлсэн 10 орны нэгээр Монгол Улс нэрлэгдсэн гэдгийг Т.Ням-Очир дурджээ. Байгалийн ухаан, унших чадварын оноонуудыг графикаар харьцуулсан мэдээлэл хүргэж байна.

Монголын сурагчдын 48 хувь нь мэдээллийн эх сурвалжийг нягтлан шалгадаг ч эцсийн дүндээ шинжлэх ухааны нотолгооноос илүү нийтлэг ойлголтод найддаг сурагчдын тоо буураагүй гэв. Математик, унших чадварын гүйцэтгэл тогтвортой хадгалагдсан ч гурван чиглэлийн үзүүлэлтүүд OECD-ын орнуудын дунджаас доогуур хэвээр байгааг албаныхан онцолж байна.