Перугийн тосгоны даргаар Хитлер Муссолини нэртэй иргэн сонгогджээ

Перу улсын орон нутгийн сонгуульд Хитлер Муссолини Симеон Флорес нэртэй иргэн ялалт байгуулсан гэж урьдчилсан дүн харуулжээ. Тэрбээр баруун жигүүрийн "Renovación Popular Perú" намын нэр дэвшигчийг ердөө 25 саналаар ардаа орхиж, Андын нуруунд орших Керопалка тосгоны даргаар сонгогдсон байна.

Төв-зүүний үзэл баримтлалтай "Ahora Nación" намын нэр дэвшигч 45 настай түүний төлөө 229 орчим иргэн санал өгсөн аж. Перугийн сонгуулийн хорооны мэдээллээр сонгуульд 700 гаруй хүн оролцсоноос Симеон нийт саналын 34 орчим хувийг авчээ.

Тосгон нь 1,000 хүрэхгүй оршин суугчтай ч нацист, фашист дэглэмийн хоёр алдартай дарангуйлагчийнхтай ижил нэртэй байгаа нь гадаадын хэвлэл мэдээллийн хэрэгслүүдийн анхаарлыг ихээр татаад байна. Нэр дэвшигчийн танилцуулгад дурдсанаар тэр нийслэл Лима хотоос 360 орчим километр зайд орших Уануко мужийн энэ тосгонд төрсөн хүн юм байна.

"Peru21" хэвлэлийн мэдээлснээр Адольф Хитлер, Бенито Муссолини гэх "20 дугаар зууны Европын тоталитар дэглэмийн хамгийн алдартай хоёр зүтгэлтэн"-ий нэрийг өөрийн нэр болгосон нь түүний сонгуулийн өрсөлдөөнийг "онцгой үйл явдал" болгожээ.

Орон нутгийн хэвлэлүүд 2018 онд Хитлер Гесклин Альба Санчес гэдэг нэртэй хүн Юнгар хотын даргаар сонгогдож байсныг мэдээлсэн байна. Тэрбээр "Би бол сайн Хитлер" гэсэн уриатайгаар сонгуулийн сурталчилгаагаа явуулж, өрсөлдөгч Ленин Владимир Родригес Валвердег ялж байжээ. 2020 онд хуучин Германы колони байсан Намиби улсад Адольф Хитлер Уунона хэмээх улс төрч орон нутгийн сонгуульд ялсан нь дэлхий нийтийн анхаарлыг татсан үйл явдал болж байв.