Оюутолгойн ногдол ашгийн зарцуулалтыг нэг удаагийн хуулиар зохицуулна

2027 онд Оюутолгой компаниас гурван их наяд төгрөгийн ногдол ашиг авч, улсын төсөвт төвлөрүүлэх асуудлыг Засгийн газар УИХ-д оруулсан. Энэхүү ногдол ашгийг хэрхэн авах, юунд зарцуулах талаар Сангийн сайд З.Мэндсайхан Төрийн ордонд мэдээлэл өглөө.

Тэрбээр Рио тинто групптэй хэлэлцээр хийх ажлын хэсгийг өөрөө ахалж, тодорхой үр дүн гаргасныг дурдлаа. Саяхан тус группийн гүйцэтгэх захирал ирж, Хувь нийлүүлэгчдийн гэрээнд ажлын хэсгийн хүрээнд гарсан өөрчлөлтийг тусгасан гэв.

17 жилийн дараа бид Оюутолгой төслийн Хувь нийлүүлэгчдийн гэрээнд анх удаа өөрчлөлт хийж, Монголын талд ирэх өгөөжийг нэмэгдүүлж чадсан. Энэ хэлцлийн хүрээнд нэг тохирсон зүйл бол 2037 оноос эхэлж авах байсан ногдол ашгийг 2027 оноос авч эхлэхээр хоёр тал тохирсон.

Рио тинто группийн гүйцэтгэх захирал ногдол ашгийг Монголын талд өгөхийг баталгаажуулснаа илэрхийлж, төсвийн тухай хуульд гурван их наяд төгрөгийн ногдол ашиг авахыг тусгасан. Компанийн 2026 оны санхүүгийн тайлан 2027 онд гарах бөгөөд хоёр талын ажлын хэсэг ногдол ашгийг хэрхэн тооцож авахыг тодорхой болгоно.

2027 онд авах гурван их наяд төгрөгийн ногдол ашгийн нэг их наядыг иргэдийн Хуримтлалын сан дахь нэрийн дансанд байршуулна. Хоёр их наяд төгрөгөөр төсвийн урсгал зардлыг нэмэгдүүлж, ахмадуудын тэтгэвэр, төрийн албан хаагчдын цалинг нэмэхэд зарцуулна.

Эдийн засгийн агшилтын үед жижиг дунд бизнес эрхлэгчдэд жилийн 10 хувийн хүүтэй зээл олгож, орон сууц авч чадахгүй байгаа иргэдэд ипотекийн зээл өгнө. Мөн дэд бүтцийн салбарыг шинэчлэх, хөрөнгө оруулалтын асуудлыг шийдэхээр төлөвлөж байгаа гэв. Эдийн засгийн тэлэлтийг хязгаарлаж буй гол салбар нь эрчим хүч, дэд бүтэц бөгөөд аймгийн төвүүдэд дулааны хязгаарлалт байгааг онцлов.

Хэлэлцүүлгийн явцад ард түмнээс асууна. Иргэд Оюутолгойн ногдол ашгаа хуримтлалын сандаа авах уу, шууд авах уу, эсвэл эдийн засагт тулгамдаж буй салбарыг шийдэх үү гэдгийг асууна.

Оюутолгойн ногдол ашгийн зарцуулалтыг нэг удаагийн хуулиар зохицуулна. Яагаад гэвэл Оюутолгойн ногдол ашиг төсвийн байнгын тогтвортой орлого биш. Дараа дараагийн төсөвт дарамт учруулахгүйн тулд хуулийн зохицуулалт хийж байгаа.