Оюу толгойн цалингын давлагаа 2.9 их наяд төгрөгт хүрчээ

Оюу толгойн үйл ажиллагаатай холбоотой цалингийн орлого улсын хэмжээнд 2.9 их наяд төгрөгт хүрсэн гэсэн тооцоо гарчээ. Энэ нь Монгол Улсын нийт цалингийн орлогын 12.6 хувийг бүрдүүлж байна.

2024 оны байдлаар тус компанийн үндсэн ажилтны дундаж цалин сард 12.9 сая төгрөг байсан бол нийт 4,674 ажилтны цалин дотоодын эдийн засагт 722.1 тэрбум төгрөгийн эргэлт үүсгэдэг. Туслан гүйцэтгэгч, ханган нийлүүлэгч компаниудын 7,500 орчим ажилтны цалин нийлээд нэг их наяд төгрөгийг давж байна.

Үндсэн болон ханган нийлүүлэгчдийн цалинг нэгтгэбэл 1.7 их наяд төгрөг давж, энэ мөнгө дотоодын худалдан авалтаар дамжин нэмэлт нэг их наяд гаруй төгрөгийн цалин бусад салбарт бий болох нөхцөл бүрдүүлдэг гэж тайлбарлажээ.

MMCG компанийн судалгаагаар нэг ажилтны цалингийн нөлөөгөөр Өмнөговь, Улаанбаатар болон бусад аймагт уул уурхайн бус салбарт 1-2 ажлын байр нэмэгддэг бол компанийн үйл ажиллагааны үржигдэх нөлөөгөөр 3-4 ажлын байр шинээр бий болж, нийт 23,110 ажлын байр идэвхжсэн байна.

Жишээ нь Эрчим хүчний инженер С.Тэлмэн Оюу толгойд 12 жил ажиллаж байгаа бөгөөд гүний уурхайд газрын гүнд 1500 метрт эрчим хүч түгээх ажлыг ес дэх жилдээ гүйцэтгэж байна. Түүний сарын цалин 10.9 сая төгрөг бөгөөд 2024 оны үзүүлэлтээр тус компанийн үндсэн ажилтны дундаж цалин сард 12.9 сая төгрөг байжээ.

Тэрбээр том охиноо математик, англи хэлний гүнзгийрүүлсэн сургалттай хувийн сургуульд шилжүүлж, долоон жилийн хугацаанд сургалтын төлбөрт 105 сая төгрөг зарцуулсан. Охин нь энэ жил ЕБС-ийг төгсөж, АНУ-ын их сургуулиас сургалтын төлбөрийн тэтгэлэг авч, ирэх намар мордохоор болжээ. Мөн гэр бүл нь орон сууцаа хоёр удаа томруулж, өмнөх ипотекийн зээлээ таван жилийн дотор төлж дуусгасан байна. Өрхийн сарын зарлага таван сая гаруй төгрөг давдаг бол гурван жилийн өмнөөс жилд нэг удаа гэр бүлээрээ аялж, аяллын зардалд 30-40 сая төгрөг зарцуулдаг болжээ.

Тэлмэнгийн гэр бүлийн энэ жилийн зорилго зундаа агаарлах цэлгэр байшинтай болох бөгөөд тэрбээр ээлжийн ажилдаа мордож, эхнэр Г.Сэржээ таван хүүхдээ харгалзан ажлаа хийж байна.