Оюу толгой эхний найман сард 5.5 тэрбум ам.долларын орлого олжээ

"Оюу Толгой" ХХК 2026 оны эхний найман сарын үйл ажиллагааны тайлангаа танилцууллаа. Тус хугацаанд гүний уурхайгаас 7.6 сая тонн хүдэр олборлохоор төлөвлөсөн байсан бол 1.8 сая тонноор давж, 9.4 сая тонн хүдэр олборложээ. Гүний уурхайн олборлолт эрчимжиж, хүдрийн биет дэх зэсийн агууламж өндөрссөнөөр баяжуулах үйлдвэрийн хэмжээ нэмэгдсэн байна.

Олборлож боловсруулсан алтны хэмжээ, агуулга ч төлөвлөгөөнөөс давсныг компанийн Гүйцэтгэх захирал Г.Мөнхсүх онцолсон байна. Тэрбээр "Зэсийн олборлолт 251.7 мянган тонн байхаар төлөвлөснөөс одоогийн байдлаар 276 мянган тонныг боловсруулаад байна. Алт олборлох хэмжээг 286 мянган унц гэж төлөвлөөд байсан бол давуулан биелүүлж 339 мянган унц алт боловсрууллаа" гэж хэлсэн байна.

Эхний найман сард 3.6 тэрбум ам.долларын орлого олохоор төлөвлөсөн бол гүйцэтгэл нь 5.5 тэрбум ам.долларт хүрчээ. Ингэснээр чөлөөт мөнгөн урсгал 2.8 тэрбум ам.доллар болсон байна.

Гүйцэтгэх захирал Г.Мөнхсүх цаашид "Гүний уурхайн олборлолтыг дагаад агуулга өсөж байна. Мөн зэсийн үнэ бидний төлөвлөснөөс илүү байгаа. Зэсийн үнийг дунджаар 10,500 ам.доллар гэж төсөөлсөн бол одоогоор 13,500 ам.доллар орчим, унц нь 3,900 ам.доллар гэж тооцсон алтны энэ жилийн дундаж нь үнэ 4,600 орчим байна" гэж мэдээлсэн байна.

"Оюу Толгой" компани 2026 оны хоёрдугаар улирлын байдлаар 834 тэрбум төгрөгийг татвар хураамж болон бусад төлбөрт төлжээ. Мөн дотоодын худалдан авалтад 1.3 их наяд төгрөг зарцуулсны 321.9 тэрбум төгрөг нь уурхайн үйл ажиллагаа явагдаж буй Өмнөговь аймагт зарцуулагдсан байна.

Нэмж дурдахад компани нь 2010 оноос хойш өнөөг хүртэл нийтдээ 62 их наяд төгрөгийг үндсэн ажилтнуудын цалин, төсөвт төлж буй татвар хураамж, үндэсний компаниудтай хийсэн худалдан авалт, хамтын ажиллагаа зэрэгт зориулсан байна.