Осол гаргасан Л.Чинбатын өмгөөлөгч: Малчны шаардсан мөнгийг төлөхгүй, хэрэг шалгалтыг явуулна

Сэлэнгэ аймгийн Цагааннуур суманд энэ сарын 1-ний 21:00 цагийн орчим "Гацуурт" ХХК-ийн захирал Л.Чинбат автомашинаар явж байгаад таван адуу мөргөсөн. Тэрбээр одоогоор эмнэлэгт хэвтэн эмчлүүлж байгаа бөгөөд хэргийг хуулийн байгууллага шалгаж байна.

Л.Чинбатын өмгөөлөгч Х.Оюунбаяр хэргийн талаар тодруулга хийхдээ "Хуулийн байгууллага шалгаж байгаа хэрэгт хөндлөнгөөс нөлөөлж байгаа юм шиг мэдээлэл задлаад байж болохгүй" гэж онцолсон.

Осол болсны дараа Л.Чинбатыг сумын эмнэлэгт хүргэж анхны тусламж үзүүлсэн бөгөөд цусны шинжилгээ авч согтууруулах ундаа хэрэглэсэн эсэхийг тогтоох аж.

Малчны хохирлын талаар өмгөөлөгч хэлэхдээ "Малчинтай тэр даруй ярьж, хэрхэн шийдвэрлэх хүсэлтэйг асуусан. Тэд '50 сая төгрөг өг, хурдын удмын адуу байсан' гээд дарамталж байна" гэж мэдэгдсэн. Тэрбээр "Яг юу болсныг хэн ч хараагүй байж нийтээрээ миний үйлчүүлэгч рүү дайрч болохгүй" гэж шүүмжилсэн.

Мөн адууны эзэд малын хариуцлага хүлээх ёстойг тэрбээр дурдаж, "Харанхуй шөнө адуу мал гэнэт зам дээр гарч ирснээс олон жолооч алдарч байна" гэж хэлсэн.