Оросын шүүх Марина Ханхалаевад 20 жилийн эчнээ хорих ял оноожээ

ОХУ-ын Өвөр Байгалын хязгаарын цэргийн шүүх буриад гаралтай тэмцэгч Марина Ханхалаевад экстремист үйл ажиллагаа зохион байгуулж, террорист байгууллага үүсгэн байгуулахад оролцсон хэргээр 20 жилийн эчнээ хорих ял оноосныг Буриад улсын дотоод хэргийн яам Баасан гарагт мэдээлсэн байна.

АНУ-д амьдардаг 53 настай дуурийн дуучин Ханхалаева нь Сибирийн Буриад улсыг ОХУ-аас салан тусгаарлах зорилготой "Тусгаар Буриад-Монгол" хөдөлгөөнийг үүсгэн байгуулагч юм. Оросын эрх баригчид түүнийг "төрийн эсрэг идэвхтэй үйл ажиллагаа явуулсан", "нийгэм болон үндэстэн хоорондын хагарал үүсгэсэн" гэж буруутгажээ.

Чита хотын цэргийн шүүх өнгөрсөн наймдугаар сард ял оноосон ч шийдвэр нь саяхан олон нийтэд ил болсон байна.

"Би Оросын хэт даврагч, террористуудын жагсаалтад багтсан тул миний эсрэг хэрэг үүсгэсэн эсэхийг мэдэхийг хичээж ирсэн ч энэ мэдээлэл нууцын зэрэглэлд хамаардаг бололтой" гэж тэрбээр "The Moscow Times" сонинд ярьжээ.

Ханхалаева өөрийнх нь эсрэг үүсгэсэн хэргийг өөрийн болон хөдөлгөөнийх нь үйл ажиллагаанд өгсөн "өндөр үнэлгээ" гэж нэрлээд, энэ нь "бидний хэлж ярьж буй бүхэн үнэн болохыг нотолж байна" гэжээ. Тэрбээр "Мэдээж хэрэг, энэ шийдвэр миний тэмцэл, үйл ажиллагаанд нөлөөлөхгүй. Харин ч эсрэгээрээ энэ нь бидний зөв зүйл хийж байгаагийн нотолгоо юм" гэж нэмсэн байна.

Тус хөдөлгөөн өнгөрсөн сард АНУ-д "Буриадын тусгаар тогтнолыг дэмжигчдийн хоёрдугаар их хурал"-ыг зохион байгуулсан бөгөөд үүний дараа Оросын эрх баригчдаас хариу үйлдэл гарна гэж хүлээж байсан гэж Ханхалаева хэлжээ. "Украинд бүрэн хэмжээний түрэмгийлэл эхэлснээс хойш таван жилийн хугацаанд Буриадын тусгаар тогтнолыг дэмжигчдийн тоо улам бүр нэмэгдсээр байна" гэж тэрээр нэмсэн юм.

"Тусгаар Буриад-Монгол" хөдөлгөөн 2024 онд Орос улсаас "террорист" байгууллагаар зарласан 172 байгууллагын жагсаалтад багтсан. Ханхалаева буруутгалыг няцааж, хөдөлгөөн "хэзээ ч хүчирхийлэлд уриалж байгаагүй", "зорилгодоо хүрэхийн тулд зөвхөн хүчирхийллийн бус арга хэрэгслийг ашиглахыг эрмэлздэг" гэж мэдэгджээ.

Буриад улс Монгол улстай 1,000 гаруй километр урт зурвасаар хиллэдэг, 970 орчим мянган хүн амтай бөгөөд оршин суугчдын гуравны нэг орчим нь монгол угсааны буриад үндэстэн байдаг.