Орос хүрэн баавгайн тоо толгойг хязгаарлах төлөвлөгөө боловсруулж эхэлжээ

ОХУ-ын засгийн газар хүрэн баавгайн тоо толгойг зохицуулах яаралтай арга хэмжээний төлөвлөгөөг боловсруулж эхэлснээ лхагва гарагт мэдэгдэв. Хэд хэдэн бүс нутагт баавгайн халдлага хяналтаас гарч, дор хаяж 22 хүний амь насыг авчээ.

Хамгийн сүүлийн тохиолдол Камчаткийн хязгаарт бүртгэгдсэн бөгөөд жимс түүж явсан 23 настай залуу баавгайд бариулж амиа алдсан байна. Өнгөрсөн долоо хоногт Сибирт нэгэн эмэгтэй гэрийнхээ хашаанд баавгайд бариулж амиа алдсан хэрэг гарчээ.

Шинжээчид ийм халдлага нэмэгдэж буйг уур амьсгалын өөрчлөлт болон хүмүүсийн хариуцлагагүй байдалтай холбон тайлбарлаж байна.

"Баавгайн тоо толгой өсөхийн хэрээр асуудал ч мөн нэмэгдэж байгаа нь тодорхой байна. Хүн болон амьтан аюулгүй зэрэгцэн орших нөхцөлийг бүрдүүлж, шаардлагатай тэнцвэрт байдлыг хадгалахын тулд цогц арга хэмжээ авах шаардлагатай" гэж засгийн газрын шадар сайд Дмитрий Патрушев хэлжээ.

"Үүнтэй холбогдуулан Оросын засгийн газар одоогоор нэн тэргүүнд авч хэрэгжүүлэх хэд хэдэн арга хэмжээний төлөвлөгөөг боловсруулж байна" гэж тэрбээр нэмж хэлсэн.

Авах арга хэмжээнүүд

• Хүрэн баавгай агнах квотыг цуцлах боломжийг судлах
• Бүс нутгийн хэмжээнд баавгайн тоо толгойн дээд хязгаарыг тогтоох
• Тоо толгойг хянах нэмэлт эрх мэдлийг орон нутгийн удирдлагад олгох
• Нэмэлт санхүүжилт шаардлагатай бүс нутгуудыг тодорхойлох

Өвөл богино, дулаан болсон зэрэг шалтгаанаар сүүлийн гучин жилд хүрэн баавгайн тоо толгой хоёр дахин өсөж, 308 мянгад хүрчээ. Орос даяар энэ хавраас хойш баавгайн халдлагад дор хаяж 22 хүн амиа алдсаныг "РИА" агентлаг мэдээлсэн.

Шинжээчдийн үзэж буйгаар энэ жил хавар эрт эхэлж, хуурайшилт ихтэй байснаас есдүгээр сард баавгайн идэш тэжээл болох жимс хомсдсон тул тэд хоол хайж алс хол явахаас өөр аргагүйд хүрчээ. Мөн хүмүүс хоол хүнсний хаягдлаа ил задгай орхин баавгайг татах зэргээр аюулгүй байдлын дүрмийг үл тоомсорлосон алдаа гаргадгийг шинжээчид анхааруулж байна.

Нутаг дэвсгэртээ 27,000 орчим баавгайтай Красноярск мужийн хуулийн байгууллага өнгөрсөн долоо хоногт орон нутгийн байгаль орчны албан тушаалтнуудын эсрэг эрүүгийн хэрэг үүсгэсэн. Зөвхөн есдүгээр сард тус мужид долоон хүн баавгайд бариулж амиа алдсан бөгөөд үүнийг албан тушаалтнуудын хайхрамжгүй байдлаас болсон гэж үзэж байна.