Орон сууцны залиланг таслан зогсоох цахим санг арваннэгдүгээр сарын 15-нд бий болгоно

Орон сууцны залилан ихээр үйлдэгдэж, олон айлын санхүү, сэтгэл санаанд хохирол учруулж байгаа тул Засгийн газраас мэдээллийн нэгдсэн сан үүсгэхээр болжээ.

Хууль зүй, дотоод хэргийн сайд Г.Тэмүүлэн: "Монгол Улсад баригдаж дуусаагүй 2,173 орон сууц байна. Эдгээрээс захиалгын гэрээтэй холбоотойгоор давхардуулан гэрээ байгуулж, иргэдийн эрх ашгийг хөндөх асуудал гарч байгаа" гэлээ.

Одоогоор орон сууцны залилантай холбоотой 173 хэрэг цагдаагийн байгууллагад шалгагдаж байна. Нийтдээ 2,208 иргэний эрх ашиг хөндөгдсөн 173 тэрбум төгрөгийн асуудлыг хууль хяналтын байгууллагууд эхнээс нь шийдвэрлэж байна.

Арваннэгдүгээр сарын 15-ны гэхэд баригдаж дуусаагүй орон сууцны мэдээллийн цахим санг бий болгоно. Уг санд барилгын зөвшөөрөл олгохоос эхлээд техникийн нөхцөл, тухайн орон сууцны барилгатай холбоотой төрд байгаа бүх мэдээллийг ил тод харуулна.

Сайд Г.Тэмүүлэн: "Иргэн хүн кино үзэхдээ сайтаар нь ороод суудлаа захиалдагтай адил сонирхсон орон сууцныхаа мэдээллийг нээхэд газар нь зөвшөөрөлтэй эсэх, ямар нэг зөрчил асуудал бий эсэх бүх мэдээлэл харагдана. Мөн тухайн орон сууцны барилгын тоот бүр нь нэг QR кодтой, нэг бүртгэлтэй, нэг гэрчилгээтэй байна" гэлээ.

QR кодонд байр нь барьцаанд байгаа эсэх, захиалгын гэрээ, өмчлөл өөрчлөгдөх зэрэг бүх мэдээлэл багтах аж.