Орон сууцны хороолол доторх замын засвар 53 хувьтай байна

Нийслэлийн зургаан дүүргийн орон сууцны хороолол доторх 34 байршлын 18.2 км авто замын засвар, шинэчлэлтийн ажил 53 хувийн гүйцэтгэлтэй явж байна.

Найман байршилд хэрэгжүүлж буй 21.9 км авто замын засвар, шинэчлэлт 88 хувь, таван дүүрэгт хийж буй 43 км явган хүний болон дугуйн зам, байгууламжийн ажил 52 хувьтай байгааг холбогдох албаныхан мэдээлэв.

Нийслэлийн хэмжээнд хотын гол болон туслах гудамж, замын арчлалт, засвар 88.6 хувьд хүрчээ.

Нийтийн эзэмшлийн явган хүний зам, талбайн 17 төсөл, арга хэмжээний дундаж гүйцэтгэл 96 хувь болж, 13 төслийг бүрэн дуусган Улсын комисст хүлээлгэн өгсөн байна. Үлдсэн хоёр төсөлд комисс ажиллуулах хүсэлт хүргүүлж, хугацаанд нь ашиглалтад оруулахаар ажиллаж байна.

Авто зам, дугуйн зам, явган хүний зам, гэрэлтүүлэг, хашлага, хайсны стандартын хэрэгжилтэд хяналт шалгалт хийхээр төлөвлөжээ.

Энэ онд авто зам, замын байгууламжийг шинээр барих, шинэчлэлтэд Замын сангийн хөрөнгөөс ₮160.8 тэрбум, нийслэлийн есөн дүүргийн авто зам, замын байгууламжийн засвар, арчлалтад ₮50.6 тэрбум зарцуулахаар нийслэлийн төсвийг баталжээ.