Орон сууц захиалгын залилан: 20 хэрэгт яллах дүгнэлт үйлдэв

Орон сууц захиалгын гэрээ байгуулах замаар иргэдийг хохироосон хэргүүдийг шалгаж шийдвэрлэх зорилгоор Нийслэлийн Прокурорын Газарт ажлын хэсэг байгуулан ажиллаж байгааг Улсын Ерөнхий Прокурорын Газраас мэдээлэв. Прокурорын байгууллага энэ оны тавдугаар сард холбогдох судалгааг хийсэн байна.

Улсын хэмжээнд 2,779 хүнд 211.1 тэрбум төгрөгийн хохирол учруулсан 76 хүн, 89 хуулийн этгээдэд холбогдох 173 хэрэг байгаагаас 93 хувь нь нийслэлд, долоон хувь нь орон нутагт шалгагдаж байсан.

Шуурхай шийдвэрлэх зохион байгуулалтын арга хэмжээ авсны үр дүнд 173 хэргээс 102 хэргийг шийдвэрлэсэн. Үүнээс 656 иргэнд 62.9 тэрбум төгрөгийн хохирол учруулсан 33 яллагдагчид холбогдох 20 хэрэгт яллах дүгнэлт үйлдэж, 12 хэргийг шүүхэд шилжүүлсэн байна.

Хэрэг шалгах явцад 102 хохирогчид 5.9 тэрбум төгрөгийн хохирлыг нөхөн төлүүлж, хөрөнгө хамгаалах чиглэлээр 372 ширхэг 42.2 тэрбум төгрөгийн үнэ бүхий эд хөрөнгийн шилжилт хөдөлгөөнийг хязгаарлаж, 1.7 тэрбум төгрөгийн хөрөнгийг битүүмжлэх арга хэмжээ авчээ.

Одоогийн байдлаар 71 хэрэг шалгагдаж байгааг Прокурорын байгууллагаас шуурхай шалгаж шийдвэрлэхэд анхаарч ажиллаж байна.