Олон баяр санхүүгийн хүнд дарамт авчирдаг гэж сэтгэцийн эрүүл мэндийн мэргэжилтэн үзэж байна

«Сэтгэцийн эрүүл мэнд-2026» олон улсын эрдэм шинжилгээний хурлын үеэр АШУҮИС-ийн Анагаах ухааны сургуулийн Сэтгэцийн эрүүл мэндийн тэнхимийн ахлах багш, Анагаах ухааны доктор, дэд профессор Д.Оюунсүрэнтэй ярилцсан байна.

Тэрбээр Монголын олон баяр нь нийгмийн стрессийг бууруулахаас илүүтэйгээр санхүү эдийн засгийн хүнд дарамт үүсгэдэг гэж үзжээ.

Монголын олон баяр биднийг нийгмийн стрессээс ангижруулахаас илүүтэй санхүү эдийн засгийн маш хүнд дарамтад оруулдаг. Өмнөх баярын санхүүгийн дарамтаасаа гарч амжаагүй байтал дараагийн сард дахиад нэг баяр тохионо

Баярыг тэмдэглэх арга хэлбэр нь олж байгаа орлогоосоо давж, байнгын хасах баланстай эдийн засгийн нөхцөл байдал гэр бүл, хувь хүнд дарамт болдог гэж тэрбээр дүгнэсэн.

Мөн гэр бүлийн хүрээнд баярлах боломж байхад олон нийтийг хамарсан баяр нь архидалт зэрэг эрүүл бус зан үйлтэй холбогддог гэдгийг онцолсон. Жишээ нь хүүхдийн сэвлэгийг үргээх үед томчууд архиддаг гэж тэрбээр хэлсэн. Ийм анзааралгүй хэвшил болсон дадлууд нийгмийн болон хувь хүний сэтгэл зүйд сөрөг нөлөө үзүүлэх эрсдэлтэй гэж мэргэжилтэн анхааруулжээ.