OCHUN Finance 40 тэрбум төгрөгийн үнэт цаасыг олон нийтэд санал болгож эхэллээ

OCHUN Finance хөрөнгийн зах зээлд шинэ алхам хийж, 40 тэрбум төгрөгийн "OCHUN Актив ХБҮЦ"-ийг олон нийтэд санал болгон урьдчилсан захиалга авч эхэллээ. Тус компани Хөрөнгөөр баталгаажсан үнэт цаас гаргах зөвшөөрлөө Санхүүгийн зохицуулах хорооноос авсан бөгөөд анхдагч зах зээлийн арилжаа 2026 оны 9 дүгээр сарын 21-нд эхлэхээр төлөвлөгдсөн байна.

OCHUN Finance нь өмнө нь биржийн бус зах зээлд 3 удаа хаалттай хүрээнд бонд амжилттай гаргаж байсан туршлагатай.

OCHUN Finance-ийн 18 жилийн өсөлт

2008 онд "Очир Ундраа ОМЗ ББСБ" нэртэйгээр байгуулагдсан тус компани нь "Очир Ундраа" группийн хөрөнгө оруулалттай. 2000 онд байгуулагдсан Очир Ундраа групп өдгөө 20 гаруй охин компаниар дамжуулан бизнесийн олон салбарт үйл ажиллагаа явуулж байна.

Өнгөрсөн 18 жилийн хугацаанд OCHUN Finance 120,000 гаруй харилцагч, 8 салбар, 80 гаруй ажилтантай санхүүгийн байгууллага болон өргөжжээ.

2025 оны санхүүгийн үзүүлэлтээр компанийн нийт хөрөнгө 134.1 тэрбум төгрөгт хүрч, өмнөх оноос 47.7%-иар өссөн байна. Өөрийн хөрөнгө 71.8 тэрбум төгрөгт хүрсэн бол зээлийн багц 45.5%-иар өсөж, 118.7 тэрбум төгрөг болжээ. Мөн 2025 онд 34.9 тэрбум төгрөгийн орлого, 15.5 тэрбум төгрөгийн цэвэр ашигтай ажилласан байна.

"OCHUN Актив ХБҮЦ" ямар нөхцөлтэй вэ?

"OCHUN Актив ХБҮЦ"-ны нийт татан төвлөрүүлэх дүн 40 тэрбум төгрөг бөгөөд нийт 400,000 ширхэг үнэт цаасыг нэг бүрийг нь 100,000 төгрөгийн нэрлэсэн үнээр санал болгоно.

• Нийт дүн: 40 тэрбум төгрөг
• Нэрлэсэн үнэ: 100,000 төгрөг
• Тоо ширхэг: 400,000
• Хугацаа: 24 сар
• Жилийн хүү: 18.5%
• Хүүгийн төлөлт: Улирал тутам
• Үндсэн төлбөр: Хагас жил тутам
• Татвар: 5.0%

ХБҮЦ-ны суурь хөрөнгө

"OCHUN Актив ХБҮЦ"-д зориулан бүрдүүлсэн зээлийн багцын нийт дүн 44.0 тэрбум төгрөг байна. Тус багц нийт 1,919 зээлийн гэрээнээс бүрдэх бөгөөд зээлийн барьцааны нийт үнэлгээ 97.6 тэрбум төгрөг байна. Ингэснээр барьцааны үнэлгээ нь бүрдүүлсэн зээлийн багцын дүнгээс 2.2 дахин өндөр байна.

Анхдагч арилжаа 9 дүгээр сарын 21-нд

"OCHUN Актив ХБҮЦ"-ны анхдагч зах зээлийн арилжаа 2026 оны 9 дүгээр сарын 21-нд эхэлнэ. Үнэт цаасны үндсэн андеррайтераар "Таван Богд Капитал ҮЦК" ХХК, туслах андеррайтераар "Ти Ди Би Секьюритис ҮЦК" ХХК, биржээр Улаанбаатар Үнэт Цаас (UBX) хамтран ажиллаж байна.