О.Цогтгэрэл: Ерөнхий сайдыг огцруулах асуудлыг бүлгийн хурал дээр эцэслэнэ

Ардчилсан намын улс төрийн зөвлөл өнөөдөр Төрийн ордонд хуралдаж, шийдвэрийг намын дарга О.Цогтгэрэл танилцуулав.

Тэрээр МАН-ын олонхын Засгийн газарт хариуцлага тооцох асуудал болон төсөв санхүүгийн хэлэлцүүлгийн талаар мэдээлэл солилцсон гэдгийг хэлэв. Мөн эрх баригч МАН-ын дотоод зодоон төрийн зовлон, түмний зүдгүүр болж байгааг дурдав.

«Ерөнхий сайдыг өөртөө итгэл үзүүлэх асуудлыг оруулж ирэх шаардлагыг манай улс төрийн зөвлөлөөс тавьж байгаа. Өнөөдөр улс төрийн зөвлөл хуралдаж байх хооронд Ерөнхий сайдын зүгээс Ардчилсан намаас тавьж буй шаардлагыг хүлээж авна гэх байр суурийг илэрхийлсэн гэж ойлгосон. Ерөнхий сайдыг огцруулах асуудлыг ойрын үед бүлгийн хурал дээр хэлэлцээд эцэслэнэ» гэж О.Цогтгэрэл хэллээ.

Тэрбээр намын байр суурийн талаар «Манай нам иргэдийн орлогыг хамгаалах, нэмэгдүүлэх чиглэлд байнга байр сууриа илэрхийлж ирсэн. Цалин тэтгэврийг нэмэх ёстой ч үрэлгэн төсвөө хасах ёстой гэсэн байр суурийг илэрхийлсэн. Улсын төсвийг цаг хугацаанд нь батлах хэлэлцүүлэгт АН-ын гишүүд идэвхтэй оролцоно» гэв.