Ө.Шижир: Улсын төсвийн 70 хувь нь зарлага

УИХ дахь Ардчилсан намынхан Пүрэв гараг бүр зохион байгуулдаг ээлжит мэдээлэлдээ 2027 оны төсвийн төслийн талаарх байр сууриа танилцуулсан.

УИХ-ын гишүүн Ө.Шижир 2027 оны төсвийг есөн шид нь бүрдсэн төсөв гэж тодорхойлж, улсын төсөв сүүлийн 10 жилд мөнгөгүйгээс биш харин мөнгөтэй байгаа ч зөв зарцуулж чадахгүй байгааг шүүмжилсэн. Төсөл хөтөлбөрүүдийн эрэмбэ, тооцоолол буруу хийгдэж байгаа гэв.

2024 онд Засгийн газар, нийслэл хот тус бүр 14, 24 мега төслийг хэрэгжүүлнэ гэж зарласан ч одоо мега төслүүдийн тоо хэдэн зуу давсан гэдгийг тэр онцолсон. 2020 оны сонгуульд МАН 21 аймагт 2100 үйлдвэр барина гэсэн ч биелэлтгүй үлдсэн, үе үеийн Засгийн газрууд ажлын үр дүнгээс илүү пиарт анхаардаг болсон гэж Ө.Шижир дурдсан.

2020 оноос хойш 2027 оны төсвийг нэмээд нийт 208 их наяд 839 тэрбум төгрөг болж байгаа талаар тэр мэдээлэв. Улсын төсөв тэлж, сүүлийн 12 жилд зарлага 10 дахин өссөн ч иргэдийн худалдан авах чадвар нэмэгдээгүйг шүүмжилсэн. Түүнчлэн 2024 оны сонгуулиас хойш хоёрхон жилд УИХ долоо дахь төсвийг хэлэлцэж байгаа нь Засгийн газрын төсвийн тооцооллын буруугаас үүдэлтэй гэж үзсэн.

Төрийн өмчит компаниудын орлогыг татах хандлага зөв ч одоогийн Засгийн газрын сайд нар өмнө нь тухайн салбарыг удирдаж байсан хүмүүс гэдгийг сануулсан. "Эрдэнэс Монгол" нэгдэл 42 компанийнхаа гурван ашигтай компанитай менежментийн гэрээ хийсэн бол удирдлагын зардал нь 500 тэрбум төгрөг болж байгааг тэр хэлсэн.

Орлого нэмэгдүүлэхээс гадна зардлыг танах шаардлагатай гэж үзэж буйгаа гишүүн илэрхийлэв. Ө.Шижир улсын төсвийн 70 хувь нь зарлага байгаа тул намын гишүүд төсвийн зардалд хяналт тавина гэдгээ мэдэгдсэн.