НЗДТГ-ын хуучин барилгыг Хүүхдийн шинжлэх ухаан технологийн ордон болгох засвар 70 хувьтай

Сүхбаатар дүүргийн нутаг дэвсгэрт байрлах Нийслэлийн Засаг даргын Тамгын Газрын гурван давхар хуучин барилгыг Хүүхдийн ордон-2 буюу "Хүүхдийн шинжлэх ухаан технологийн ордон" болгохоор шийдвэрлэсэн бөгөөд засварын ажил 70 хувьтай явж байна.

Монголын Хүүхдийн ордны захирал Б.Цэнгэлмаа "Засварын ажил наймдугаар сарын 4-ний өдрөөс эхэлсэн. Өнөөдрийн байдлаар засвар, тохижилтын ажил 70 хувьтай үргэлжилж байна. Хүүхдэд аюулгүй, ээлтэй барилгын материал сонгоход Чингэлтэй, Хан-Уул дүүргээс тус бүр хоёр байгууллага оролцож, хүн хүч нэмсэн" гэж мэдээллээ.

Тэрбээр "Энэхүү барилга нь оффисын зориулалттай, олон жижиг танхимтай, соёлын өвд бүртгэгдсэн учраас ханыг нураахгүй, бүтээцийг өөрчлөхгүй. Шинжлэх ухааны лаборатори гэхэд зэрэгцээ гурван ангид тус бүр 6-8 хүүхэд хичээллэхээр тооцсон юм" гэж хэлсэн.

Мөн "Санхүүжилтийг нийслэлийн Засаг даргын зүгээс удаахгүй шийдвэрлэж өгч байгаа" гэж тэр нэмж хэлэв.

Хүүхэд багачуудыг шинжлэх ухаан, технологид дуртай болгох, тэдний бүтээлч сэтгэлгээг хөгжүүлэх зорилготой тус ордны хаалгыг Сүхбаатарын талбай руу харуулах бөгөөд энэ оны аравдугаар сард ашиглалтад оруулахаар төлөвлөжээ.

Харин Хүүхдийн Урлан бүтээх төвийн барилгыг 2027 онд хүчитгэхээр болсон байна.