НИТХ: 29 ус түгээх байр, төлбөр хураах цэгийг актлахаар шийдвэрлэв

Нийслэлийн Иргэдийн Төлөөлөгчдийн Хурал (НИТХ)-ын ээлжит бус XIV хуралдаан өнөөдөр хуралдаж, барилга байгууламж акталж, нийслэлийн өмчийн бүртгэлээс хасах тухай тогтоолын төслийг хэлэлцэн баталлаа.

Төслийг танилцуулах үеэр Нийслэлийн Засаг даргын Эдийн засгийн хөгжил, дэд бүтцийн асуудал хариуцсан нэгдүгээр орлогч Б.Мөнхбат Улаанбаатар хотын Ус сувгийн удирдах газрын ОНӨААТҮГ-т бүртгэлтэй, ашиглалтын шаардлага хангахгүй, үйл ажиллагаа нь бүрэн зогссон болон дахин төлөвлөлтийн бүсэд орсон 29 ус түгээх байрыг актлах саналыг хүргэв. Эдгээр байрны бүртгэлийн үнэ 478.6 сая төгрөг, үлдэх өртөг нь 232.2 сая төгрөг гэж тэрбээр мэдээлэв.

Тэрбээр "Дээрх ус түгээх байрууд ашиглалтын шаардлага хангахгүй тухай нийслэлийн хяналт шалгалт болон холбогдох мэргэжлийн байгууллагаас дүгнэлт гарч үйл ажиллагаа нь бүрэн зогссон" гэж хэлсэн.

Мөн төмөр замын траст өртөж ашиглалтын шаардлага хангахгүй болсон Сонгинохайрхан дүүргийн нутаг дэвсгэрт байрлах барилга байгууламжийг актлах тогтоолын төслийг танилцуулав. Уг барилгын бүртгэлийн үнэ 442.8 сая төгрөг, үлдэгдэл өртөг нь 317.3 сая төгрөг. Багахангай-Хөшигийн хөндий, Эмээлт чиглэлийн салбар төмөр замын бүтээн байгуулалтын ажлын хүрээнд тус газарт байрлах төлбөр хураах цэгийн барилга, шугам сүлжээг буулган актлуулах хүсэлтийг нийслэлийн Авто замын хөгжлийн газраас 2026 оны холбогдох албан бичгээр ирүүлсэн гэж Б.Мөнхбат тайлбарлав.

Иргэдийн Төлөөлөгчдийн 58.1 хувийн саналаар дээрх тогтоолыг баталлаа.