Нийтийн тээврийн жолооч нарын “Уран жолоодлого-2026” тэмцээн үргэлжилж байна

Аравдугаар сарын 17-18-нд Монгол наадам цогцолборт нийтийн тээврийн жолооч нарын дунд “Уран жолоодлого-2026” тэмцээн болж байна. Тус тэмцээнд нийтийн тээврийн үйлчилгээний есөн байгууллагын 10 багийн 70 гаруй жолооч оролцож байна.

Тэмцээнийг 2019 оноос хойш тогтмол зохион байгуулж байгаа. Замын хөдөлгөөний дүрэм зөрчөөгүй, харилцаа хандлага, ёс зүйн зөрчилгүй жолооч нарыг шалгаруулж тэмцээнд оролцуулдаг.

Уран жолоодлогын тэмцээн нь тээврийн үйлчилгээ болон жолооч нарын харилцаа хандлагыг төлөвшүүлэх, мэдлэг, ур чадварыг нэмэгдүүлэх, олон нийтэд сурталчлах ач холбогдолтой гэж эх сурвалж мэдээлэв.

Жолооч нарын гүйцэтгэх даалгавар

• Цуваагаар явах, хоёр хоёроор зэрэгцэж явах, 450 градус тойрог эргэх,
• Нэг шулуунд зэрэгцэж зогсох, эсрэг зүгт зэрэгцэн зогссон байрлалаас хоёр тийш зэрэг хөдлөх,
• Нэг шулуунд зогсох, адил талт тэгш өнцөгт үүсгэж зогсох, 45 градусын өнцгөөр зүүн гар тийш эргэж, нэг зүгт цувж зогсох,
• Нэг шулуунд цувруулан байрлуулсан 7 саадыг нэг талаас нь цуваагаар сүлжиж явах,
• Нэг шулуунд цувруулан байрлуулсан 7 саадыг нэг талаас нь эгнээ дагаж орж сүлжиж явах,
• Нэг шулуунд цувруулан байрлуулсан 7 саадыг хоёр талаас нь салган цуваагаар сүлжиж явах,
• Багийн ахлагч нар дараалсан дөрвөн үйлдэл гүйцэтгэх,
• Багийн гишүүн бүрийн мэдлэг, харилцаа хандлагын сорил, тестийг бөглөх.