Нийслэлд томуугийн вакцинжуулалтын аян эхэллээ

Нийслэлд “Томуугийн эсрэг хамтдаа” дархлаажуулалтын аян эхэлж, 10 дугаар сарын 3-ныг хүртэл нэг сарын хугацаанд үргэлжилнэ. Энэ хугацаанд томуугаар өвдөх өндөр эрсдэлтэй зорилтот бүлгийн 293,619 иргэнийг вакцинд үнэ төлбөргүй хамруулахаар төлөвлөжээ.

Нийслэлийн Эрүүл Мэндийн Газрын дарга Н.Наранбаатар өнгөрсөн жил нийслэлд томуугийн 106,912 тохиолдол бүртгэгдсэний 50 хүртэлх хувийг 0-6 насны хүүхдүүд эзэлсэн гэдгийг онцлов. Нийслэлд энэ насны 230 мянга орчим хүүхэд амьдардаг бөгөөд тэдний 210 мянга буюу 80 гаруй хувийг вакцинд хамруулахаар зорьж байна.

Томуугийн улирлын идэвхжил аравдугаар сарын дунд үеэс нэмэгддэг тул өвчлөл эрчимжихээс өмнө вакцинжуулалтад хамруулахыг зорьж байгаа аж. Вакцин хийлгэснээс хойш 10-14 хоногийн хугацаанд дархлаа тогтдог. Зорилтот бүлгийг бүрэн хамруулснаар томуугийн халдвараас үүдэх эрсдэлийг 75 хүртэлх хувиар бууруулах боломжтой гэж тэрбээр мэдээлэв.

Иргэд өөрт хамгийн ойр өрхийн эмнэлэг, эрүүл мэндийн төвд хандаж томуугийн вакцинд хамрагдах боломжтой. Энэ жил ДЭМБ-аас зөвлөмж болгосон БНСУ-д үйлдвэрлэсэн 4 цэнт вакциныг Засгийн газрын санхүүжилтээр НҮБ-ын Хүүхдийн сангаар дамжуулан 500 мянган хүн тунг худалдаж авчээ.