Нийгэм эдийн засгийн үзүүлэлт багатай сурагчдын PISA үнэлгээний гүйцэтгэл ахисан

Монгол Улс 2025 онд Сурлагын Амжилтын Олон Улсын Үнэлгээ (PISA)-д хамрагдсан. Энэ удаад дэлхийн 91 улсын 760 мянга гаруй суралцагч оролцсон бөгөөд Монголын 191 сургуулийн 7,146 суралцагч тус улсын 59,900 суралцагчийг төлөөлжээ.

Үнэлгээний дүнгээр Монгол сурагчдын байгалийн ухаан, математик, унших чадварын гүйцэтгэл OECD-ын дунджаас доогуур байгаа ч дөрвөн үзүүлэлтийн дунджаар 91 орноос 49-д жагссан байна.

Боловсролын яамны Төрийн нарийн бичгийн дарга Т.Ням-Очир үр дүнг танилцуулахдаа нийгмийн эдийн засгийн үзүүлэлт өндөр өрхийн хүүхдүүдийн гүйцэтгэл давуу нөхцөлгүй суралцагчдаас 71 оноогоор илүү гарсныг онцолсон. Харин OECD-ын энэ үзүүлэлт дунджаар 85 хувьтай байдаг гэв.

Хот хөдөөгийн ялгаа багассан үзүүлэлт ажиглагдаж, нийслэл, аймгийн төв, сумын сурагчдын байгалийн ухааны гүйцэтгэл ойртсон. Мөн төрийн болон хувийн сургуулиудын хоорондын ялгаа гурван чадварт тэгш болжээ.

PISA-2025-д оролцсон улсуудын нийгэм эдийн засгийн үзүүлэлт буурсан ч Монголд нийгэм эдийн засгийн үзүүлэлт багатай сурагчдын гүйцэтгэл ахисан бол өндөр үзүүлэлттэй сурагчид өмнөх түвшингээ хадгалжээ.

Байршлаар авч үзвэл нийслэлээс алслагдах тусам байгалийн ухааны гүйцэтгэл буурч байгаа нь ажиглагдсан. OECD-ын дунджаас дээгүүр гүйцэтгэлтэй суралцагчид ихэвчлэн нийслэл болон аймгийн төвд суралцдаг бөгөөд 2022 оноос хойш энэ үзүүлэлт мэдэгдэхүйц өөрчлөгдөөгүй.

Сургууль доторх ялгаа сургууль хоорондынхоос өндөр хувьтай байгааг Т.Ням-Очир дурдаж, энэ нь багш, менежменттэй холбоотой байж болзошгүй гэв.

Суралцагчдын сэтгэл ханамжийн хувьд 2022 оныг бодвол 2025 онд сайжирсан. Эрэгтэй суралцагчдын сайн сайхан байдлын үзүүлэлт 7.4-өөс 8 болж, эмэгтэй суралцагчдынх 7-оос 7.7 болж өссөн. Сургуулийн орчинд аюулгүй мэдрэмжтэй суралцагчид амьдралдаа илүү сэтгэл хангалуун байх хандлагатай гэж тэрбээр тайлбарлав.