Нидерланд 86 тонн алтаа АНУ, Канадаас Лондон руу шилжүүлжээ

Нидерландын төв банк АНУ, Канадад хадгалж байсан 86 тонн алтны нөөцөө Лондон руу шилжүүлсэн байна. Уг шилжүүлгийг геополитикийн тогтворгүй байдал нэмэгдэж буйтай холбон тайлбарлажээ.

Төв банкны ерөнхийлөгч Олаф Слейпэн “Хямралын үед бид Лондонд байгаа нөөцөө Нью-Йорк, Оттавад байгаагаас илүү хурдан ашиглах боломжтой. Энэ алхмаараа бид алтны нөөцийн хөрвөх чадварыг сайжруулж байна. Бид алтны нөөцөө ашиглах шаардлага хэзээ ч гарахгүй гэж үзэж байгаа ч бэлэн байдлаа бэхжүүлэх шаардлагатай” гэж мэдэгджээ.

Өмнө нь Нидерландын алтны нөөцийн 31.3 хувь Нью-Йоркт, 19.7 хувь Оттавад хадгалагдаж байсан бол шилжүүлгийн дараа хоёр хотод тус бүр 18.5 хувь үлдэж, Лондон дахь хувь 18.1 хувиас 32.1 хувь болж нэмэгдсэн байна. Нидерландын төв банк нийт нөөцийнхөө 30.8 хувийг өөртөө хадгалдаг ажээ.

Шилжүүлгийг зарах болон авах, биетээр тээвэрлэх гэсэн хоёр аргыг хослуулан хийсэн бөгөөд 27 тонн алтыг нисэх онгоцоор Зейст хот руу тээвэрлэж, дараа нь Лондон руу шилжүүлсэн байна. Энэ ажиллагаа энэ оны гуравдугаар сараас наймдугаар сарын хооронд хэрэгжиж дууссан гэж төв банк мэдээлжээ.

Cite Gestion Private Bank банкны шинжээч Жон Плассард энэхүү алхмыг хямралын үед алтны нөөцөд хурдан хүрэх зорилготой гэж дүгнэсэн бол дэлхийн бусад төв банкнууд Нидерландын жишгийг дагавал АНУ-д итгэх итгэл алдагдаж болзошгүйг анхааруулжээ. Энэ оны эхээр Германы Бундесбанк Нью-Йорк дахь алтны нөөцдөө санаа зовниж байгаагаа илэрхийлсэн ч одоогоор нөөцөө хөдөлгөхгүй байх шийдвэр гаргасан байна.