Нацист эмч Менгелетай холбоотой 200 хуудас баримт ил болов

Швейцарын Холбооны тагнуулын алба пүрэв гарагт Нацист Германы эмч, дайны гэмт хэрэгтэн Йозеф Менгелетай холбогдох 200 хуудас баримтыг нийтэд дэлгэсэн байна.

Аусшвицийн хорих лагерьт хоригдлууд дээр эмнэлгийн туршилт хийж байсан түүнийг “Үхлийн сахиусан тэнгэр” гэж нэрлэдэг байв. Дэлхийн хоёрдугаар дайны үед Польшийн нутаг дахь уг лагерьт 1.1 сая орчим хүн, түүний дотор нэг сая орчим жүүд амь үрэгджээ.

Менгеле шинжлэх ухааны судалгааны нэрээр хоригдлууд, ялангуяа хүүхдүүд дээр харгис туршилт явуулж байсан гэдэг. Дайны дараа хуурамч нэрээр Улаан Загалмайн бичиг баримтыг ашиглан Европоос зугтаж, Латин Америкт олон жил нуугдсаны эцэст 1979 онд Бразилын эрэг орчимд сэлж байгаад живж нас баржээ.

Шинээр нийтлэгдсэн баримтад Менгеле дүрвэсний дараа хуурамч нэрээр Швейцарт ирсэн байж болзошгүй эсвэл ирэхээр төлөвлөж байсан тухай тагнуулын мэдээлэл багтсан байна. Түүнийг эрэн сурвалжилж байх хугацаанд Швейцарт хэсэг хугацаанд байсан эсэхийг түүхчид архивын нууц баримтаар батлахыг олон жил эрэлхийлж байсан юм.

Швейцарын эрх баригчид дурдагдсан хүмүүсийн аюулгүй байдлыг хангах үүднээс эдгээр баримтыг 2071 он хүртэл нууцлах ёстой гэж үзэж байв. Гэвч түүхч Жерард Уэтстейн уг хоригийг цуцлуулахаар Холбооны Захиргааны шүүхэд хандсан нь амжилтад хүрч, баримтууд ил болсон байна.

Нийтлэгдсэн баримтад зарим гуравдагч хүний хувийн нууцыг хамгаалах үүднээс нэр усыг нь дарсан байна.