Намрын улиралд хүчтэй салхины идэвхтэй үе ажиглагдаж, түймрийн аюул нэмэгддэг

Монгол орны намар богино, хуурай, сэрүүсэлт эрчимтэй улирал бөгөөд дулаанаас хүйтний горимд хурдан шилждэг. Есдүгээр сарын эхээр өдөр дулаан хэвээр боловч шөнийн хөрөлт нэмэгдэж, хяруу, цочир хүйтрэл эхэлнэ. Улирал ахих тусам температур түргэн буурч, бороо цасанд шилжиж, салхины идэвхжил нэмэгддэг байна.

Энэ жилийн есдүгээр сард өдөртөө харьцангуй дулаан өдрүүд үргэлжилж болох ч шөнөдөө дулаан алдалт эрчимжиж, температур огцом буурах, зарим үеүүдэд уулархаг нутгаар нойтон цас орох, хөрсөн дээр цочир хүйтрэх зэрэг үзэгдэл олон жилийн дунджаас эрт ажиглагдах магадлалтай.

Хүчтэй салхины идэвхтэй үе

9-11-р сард хүчтэй салхины жилийн хоёр дахь идэвхтэй үе ажиглагддаг. Намрыг температур хурдан буурч, хяруу нэмэгдэн хур тунадас багасаж, салхи идэвхэждэг өвлийн өмнөх шилжилтийн улирал гэж тодорхойлж болно.

Температурын төлөв

Есдүгээр сарын дундаж температур хойд нутгаар +7...+8 градус, говьд +10...+12 градус орчим. Өндөр уулсаар 8-р сарын сүүлчээс сэрүүсэлт эрчимжиж, хоногийн дундаж температур +10 градусаас доошилж эхэлдэг. Сүүлийн жилүүдэд есдүгээр сар харьцангуй дулаан байгаа бөгөөд 2019 оны 9-р сар олон жилийн дунджаас 3.4 градусаар дулаан, түүхэн хамгийн дулаан сар болж байжээ.

Энэ жилийн агаарын дундаж температур ихэнх нутгаар олон жилийн дунджийн орчим, баруун өмнөд хэсгээр дулаан, төв болон зүүн аймгуудын зарим нутгаар сэрүүн байх төлөвтэй.

Түймрийн эрсдэл

Намрын түймрийн аюултай үе жил бүрийн 9-р сарын 20-ноос 11-р сарын 10 хүртэл үргэлжилдэг. Энэ үед өвслөг ургамал хатаж, газрын чийг багасахын зэрэгцээ салхины нөлөөгөөр гал түймэр гарах, тархах эрсдэл нэмэгддэг. Хуурайшилт нь бороо багассанаас гадна температур, ууршилт, салхи, хөрсний бүтэц зэргээс хамаарна.

Иргэд ой, хээрийн бүсэд зорчихдоо галын аюулгүй байдлыг чанд сахиж, ил задгай гал түлэхгүй байх, асаасан гал, чүдэнз, тамхины галыг бүрэн унтраахыг онцгойлон анхааруулж байна.