Н.Учрал: 2027 онд 16 мянган айлыг ипотекийн зургаан хувийн зээлээр орон сууцанд оруулна

"100 мянган айлын орон сууц" үндэсний хөтөлбөрийг хэрэгжүүлэх асуудлыг Засгийн газрын ээлжит хуралдаанаар хэлэлцсэн талаар Ерөнхий сайд Н.Учрал мэдээлэв.

Төрийн мэдэлд "Сэлбэ", "Шархад", "Солонго I, II" хороолол зэрэгт 3,572 айлын орон сууц баригдаж байгаа гэдгийг тэрбээр дурдав. Түүний хэлснээр, 2027 онд 8,238, 2028 онд 11,246 айлын орон сууц нэмэгдэж, 2030 онд 40,000 айлын орон сууц ашиглалтад орно. Харин хувийн компаниудын 14,832 айлын орон сууц энэ 2026 онд ашиглалтад орж, 2030 он гэхэд 82,000 гаруй айлын орон сууц баригдана.

"50 мянган яндан буулгах, 100 мянган айлын орон сууц" үндэсний хөтөлбөр эхэлснийг албан ёсоор мэдэгдэж байна. 2027 онд 16 мянган айлыг ипотекийн зургаан хувийн зээлээр орон сууцанд оруулах бөгөөд сонгон шалгаруулалтыг нээлттэй, ил тод зохион байгуулна.

Төрийн мэдлийн 40,000 орон сууцанд урьдчилгаа төлбөр шаардахгүй. 45 м.кв, хоёр өрөө орон сууцаар жишээ авбал дөрвөн сонголт байна.

• Нэгдүгээрт, түрээсийн орон сууц. Сарын түрээс 700,000 төгрөг.
• Хоёрдугаарт, түрээслээд өмчлөх хэлбэр. Түрээст сард 700,000 төгрөг, өмчлөлдөө 720,000 төгрөг төлж, сард 1,420,000 төгрөг болно. Эдгээр хоёр сонголтод урьдчилгаа төлбөргүй.
• Гуравдугаарт, түрээслээд өмчлөх болон ипотекийн зээлийн хэлбэр. 30 хувийн урьдчилгаа төлбөр цуглуулах шаардлагагүй. Түрээсийн төлбөр дээрээ сар бүр 860,000 төгрөгийг таван жилийн турш төлж, урьдчилгаа төлбөрөө бүрдүүлнэ.
• Дөрөвдүгээрт, хамтын өмчлөл. Орон сууцны ордер гэрчилгээнд банк, НОСК хамтран өмчилнө. Орон сууцны 50 хувийг түрээс, эсвэл түрээслээд өмчлөхөд тооцож, үлдсэн 50 хувьд нь зээл авна. Урьдчилгаа төлбөрийн босго хоёр дахин намсаж, зээл, хүүгийн төлбөр тал хувиар багасна.

Төрийн мэдлийн 40,000 орон сууцны талаас илүүд гэр хорооллын айл өрх орж, газрыг нь үнэлж, төлбөрт нь тооцно.

Хувийн компаниудын барих 60,000 орон сууцыг зургаан хувийн зээлд хамруулах бөгөөд анх удаа орон сууцтай болох айл өрхөд зориулна. 39,000 айлыг зургаан хувийн зээлд хамруулж, 21,000 айлыг эхний гурван жилд зургаан хувь, үлдсэн 17 жилд 12 хувийн зээлд хамруулах сонголттой. Хотын бүс, байршлаас хамаарч, хүн амын төвлөрөл, ачаалал, түгжрэлийг харгалзан хүү, нөхцөл өөр байхаар төлөвлөсөн.