Н.Алтанхуяг: Бүлгийн даргад туршлагатай, тулхтай улс төрч хэрэгтэй

УИХ дахь Ардчилсан намын бүлэг өнөөдөр хуралдаж, бүлгийн даргаа сонгох гэж байна. Бүлгийн даргад Х.Тэмүүжин, Б.Түвшин гэсэн хоёр гишүүн нэрээ дэвшүүлээд байна. Гишүүдийн ирц бүрэн байна.

Шинээр сонгогдох бүлгийн дарга ямар үүрэг хариуцлагатай байх талаар Н.Алтанхуяг байр сууриа илэрхийлэв. Тэрбээр авлига, хээл хахууль зэрэг тулгамдсан асуудлыг хэлэлцүүлэхээр оруулж ирдэг, цаг үеэ мэдэрдэг, тодорхой хэмжээний туршлагатай хүн бүлгийг удирдвал зүгээр гэж үзэж байна.

Зарим оронд намын дарга нь парламент дахь бүлгээ ахалж ажилладаг жишиг бий. Харин манай намын хувьд сонгууль дөхөж байгаа учраас намын дарга сонгуулийн бэлтгэл болон намын түвшний ажилдаа илүү анхаарал хандуулахын тулд бүлгийн даргаа сонгож байна.

Мөн тэрбээр энэ нь хэрүүл, зодоон хийх асуудал биш гэдгийг онцлов. Дарга болно гэдэг хариуцлага хүлээнэ гэсэн үг бөгөөд дарга болчихоод ажил хийхгүй байж болохгүй гэлээ. Хоёр нэр дэвшигчийн хэн нь ч бүлгээ удирдаж чадна гэж тэрбээр үзэж байна. Заавал хэд хэдэн удаа сонгогдсон хүн дарга байх ёстой гэсэн үг биш гэж нэмж хэлэв.